Ars moriendi

¶ Van die gruwelijcke dieren dye in die helle zijn. ende van die anxtelicke pine die si den verdoemde sielen aen doen

HIer zalmen nu voert weten dat in de helle zijn onuerdraechlijke rasende helsche dieren die alsoe verwoet ende rasende zijn datmen hoer verwoetheit nummermeer vutspreken en mach. Als helsche honden. beren. leeuwen. woluen. draken. lijndewormen. ende menigerhande ander dieren die also onbekent ende vreesselick zijn alsmen bedencken mach
§ Dese doen den verdoemden sielen ontsprekelike pine ende ouerlaste. Si zijn alsoe wreet datmense niet en mach binden. oeck zijn si alsoe felle dat mense niet en mach stillen ofte temmen. Si bernen oeck alsoe gruwelick ende si stincken alsoe anxtelick ende si zijn oec also hongyerich datmense nummermeer verzaden en mach. Die onghenadelike ende felle dieren quellen ende pinighen die ellendighe vermaledide sielen alsoe ongenadelick ende iamerlick zonder eynde ofte enighe barmherticheyt. dat hem dunct waert moghelick si souden verschoert ende verslijnt werden vanden wreden dieren.

¶ De verdoemde sielen werden oeck doer dijstel ende dornen ghetogen dat hen velle ende vleysche daer aen blijft hanghen ende dat bloet springhet hem tot allen leden vut overmits die gruwelicke pine. Sij werden oeck opghehanghen in allen leden daer si in ghezundighet hebben. in heetten in couden in stanck in roeck ende also iamerlick werde si gheperst ende ghepinighet dat hem duncket alle hoer leden te bersten ouermits den groten verueerlicken pinen daer si mede ghepinicht werden.