Ars moriendi

§ Nu salmen verstaen ende mercken in wat manieren dat die duuels ende die zundighe verdoemde menschen ghepinicht ende ghequellet werden

DAt fundament der hellen is siedende peck ende zweuel Dit is also verueerliken brant dat een mensche mach gruwelen die dit hoert segghen Och is dit verueerlick te horen segghen hoe anxtelick ende hoe verueerlick moetse dan den ghen wesen die daer ewelick in braden ende in sieden moeten. ¶ Daer is oeck een onuerdrachlick mist ende stinckende roeck alsoe groet dat die schoen ansich-

[fol. 22v]

ten alsoe zwert zijn ghelikerwijs colen ende eerde.
§ O onuerdrachelick stanc hoe iamerlick pijnighestu die ellendyge verdoemde sielen mit alsoe anxeelijcker pijnen dat gheen mensche die pijne vutspreken en mach.

¶ Daer zijn oeck onuerdrachlijke ende wrede wormen die altoes hongherich zijn ende nummermeer versadet en mogen werden. Hier staet aldus ghescreuen. Men en mach dat cnaghen ende bijten in die helle nummermeer ontgaen. Deze felle wormen doen den vermalediden sielen alsulke ontsprekelike pijn ouermits horen cnaghen ende bijten daer si nummermeer af op en houden noch oeck nummermeer versadet en moghen werden. Mer altoes pijnighen si die sielen myt horen bijten oftet hongyerighe honden waren.
§ O wee o wee der anxtelijker leliker wormen. O wee dit onghenadelike cnaghen ende bijten.

¶ In die helle zijn oeck ontellike wormen vuerich fenijnt ende stinckende onreyne als padden ende spinnen. als eghelen. slanghen ende aderen. egedissen ende draken ende al onreyne ende fenijnde wormen diemen bedencken mach. dese cruypen omme die vermaledide sielen ende suykense ende stekense ende bijtense iamerlick in allen leden. Ende deze gruwelike wormen cruypen hem oeck tot alle leden vut. als vten monde daer si onnute ende quade woerden mede ghesproken hebben. Vut den oren si onbetamelike dinghen mede ghehoert hebben. ende daer si oeck dat woert godes mede ghehoert hebben dat si van hem verdreuen hebben ende daer niet op geachtet en hebben. Vut den handen daer si ontschamelike dinghen mede ghestaltet hebben. Ende si werden ontsprekelik ghepinighet in allen leden daer si mede ghezundighet hebben. Deze onghenadelike wormen doen die voerdoemde sielen alsoe grote verueerlike pijn an dat hem duncket dat si hoer lede te scoren ende te bersten van bouen tot beneden ouermits die ontsprekelige grote anxtelike pijne.