Van Arent Bosman: een mirakel dat geschiede int jaar 1433 in den lande van Cleve

¶ Ca. xxxviij.

DOe die geest ende arent tsamen lange gesproken hadden. doe seide die geest Ic beghere oerlof op dat mi nimant en sie diet hinderen mochte Doe seide arent. wanneert gode behaget ende di so vaer in gods name. Doe sprac die geest gode si altoes lof ende ere ende sijnre ghebenedyder moeder marien ende allen vutuercoren geesten ende di dat ewige loen van gode. Alst v alre best gaet so danct god alder meest. ende als di god lijden toe sent so wes verduldich ende hout in dijnen sin wat di god heeft laten openbaren Ende so sprac die geest. lof si gode inde hoecheit der hemelen ende die ommeganc der aerden si vrede Ende doen voer die geest van arent Ende arent was blint met-

[fol. e4r]

ten enen oge daer hi die claerheit mede sach Ende doe die geest te gode was doe dede hi den bant vanden anderen oge ende sach dattet scoen dach was ende dat volc vanden houe was op ghestaen om te sien hoet met arent waer ende si leiden arent thuys wert dit was op ons heren hemeluaertsdach ende arents oge bleef doncker tot opten pinxter dach toe. doemen dat heilige sacrament op boerde doe sach arent claerder met dat doncker oge dan metten anderen oghe