Van Arent Bosman: een mirakel dat geschiede int jaar 1433 in den lande van Cleve

Capittel xxxvij.

DOe sprac die geest arent alle die woorden die ic v gheseit hebbe die heb ic v gheseit vander barmherticheit gods om v ende den genen te leren die gaerne tot gode waren ende dien sult ghi te weten doen diet van ynnicheit gaerne horen Doe seide arent. ic bin alte cranc van veruaernis die ic van v ghehat heb so dat ic geen sinnen en heb alle punten na te seggen Die gheest seide wat ic v geseit heb ten sal v niet vergeten Ende gi sult der veruaernis wel vergeten Ende genesen op een weinich datstu behouden selste

[fol. e3v]

op dattu gods mirakel in dijnre herten hout Doe vrachde arent. of mi god die gracie gaef dat ic noch leerde scriuen. mach ic dan alle saken wel bescriuen die ic van v gesien ende gehoort hebbe Die geest seide Ia Ende het is groot weldaet datmen enen kersten mensch waerscuwet voor die helsche pine. want daer mede waerscuwet hi oec hem seluen Doe sprac die geest voort du selste vander gracien gods wel so lange leuen datstu wel scriuen selt dat de wille gods is van alle saken ende die bose geesten sullen di hinderen waer sy mogen. ende het gesciede also als arent een punt voor genomen hadde te scriuen so brocht hem die bose geest ander dingen inden sin