Van Arent Bosman: een mirakel dat geschiede int jaar 1433 in den lande van Cleve

¶ Capittel xxxvi.

ARent soude hier noch ghescreuen hebben vanden salighe luden die gerne almisse gheuen hoe god die weder spijset in die vre hoere doots Oec soude hi gescreuen hebben vande pijne der geenre die die arme verdrucken ende valsche ede sweren. mer het soude

[fol. e2v]

te lanc vallen Ende die geest sprac tot arent soude die mensche tot gode comen so moest hi immer die x geboden gods houden mer hebben wise versuimt laet ons biechten ende penitencie doen so en wil god der sonden niet gedencken Doe vraechde arent hoe hem een mensche soude segenen voor sinen viant Die geest antwoerde: die mensche sal hem segenen des morgens als hi op staet ende slaen iij: crucen voor hem ende seggen Ihūs van nazarenen coninc der ioden ontfermt v mijnre so is die mensch beschermt voor sinen vianden sienlic ende onsienlic Op een tijt als arent sprac metten geest verhief een onweder op van storm ende regen ende duerde tot opten anderen dach Doe vraechde arent. waerom dattet onweer was Die geest antwoerde. daer heeft een man hem seluen verhangen binnen deser vren ende een wijf haer eigen kint vermoort ende dat wil god wreken ouer veel creaturen so leet is god den doot der sondaren die hem seluen doden Tot meyderic was een oude vrouwe die xix. iaer weduwe hadde geweest si wort te wael cranc recht of si steruen soude Doe vraechde arent den geest of si leuen mocht Die geest antwoorde Ya god heeft haer leuen een deel iaren verlenget ende hoer oeck stercheit gegeuen hoors lijfs op dat si hem dienen mach als si langhe ghedaen heeft Doe vraechde arent waer om verlanget

[fol. e3r]

god haer leuen Die geest antwoerde Sy heeft ix: zielen hoer pijn gecort die wel vij. iaren noch in pinen gheweest souden hebben die si verlost heeft met hoer gebeden ende aelmissen ende si heeftse oec laten spisen metter heiliger missen die si dede doen daer om hebben die zielen gode voor haer gebeden dat si langhe leuen soude op datse veel penitencien mochte doen Doe vraechde arent wat penitencie sal si doen. Die geest antwoerde Si plach innichlick te beden te vasten aelmissen te geuen ende veel missen te horen Alle die tijt wort haer voor gode voer penitencie gerekent Mer segt haer immer dese woerden niet op dat si hoer niet waerdich en kenne tot gode te comen sonder pine. want alle houaerdie ende ydel ghedachten vernederen den mensch voor gode