Van Arent Bosman: een mirakel dat geschiede int jaar 1433 in den lande van Cleve

¶ Capittel xxxiiij.

DOe sprac die geest van veel genaden dye men verdienen mach inder missen die sijn sonden leet sijn Ende oec seide hi vanden priesteren die van innicheit misse doen hoer leuen en machmen niet vut spreken Ende die menschen die berou hebben verdienen grote salicheit wanneer si seggen inder missen. O here ihū criste weest mi arme sondaer ghenadich om uwer groter ontfermherticheit die woorden hoort god lieuer dan al der engelen sanc inden hemel

Ende voort sprac die geest van veel verdienten die inder missen sijn te verdienen als die leraers dat bescreuen hebben. Doe die geest ende arent dus lange spraken dat was inder lester nacht. Doe seide arent Ic loofde een beuaert tot sint iacob te compostelle om die veruaernis die ick eerst van v hadde op dat sint iacop voor mi bidden

[fol. e1v]

soude dat ic van v verlost werden hoe sel ic daer mede doen. Die geest antwoerde alle beloeften maken scult. Doe vraechde arent: ende en mach ic mi geen ander penitencie laten setten dat ic die beuaert niet en doe. Die geest antwoorde: dats alleen in des paeus macht .iij. pelgrimagien als te iherusalem te romen ende tot sint iacob of te nemen den genen dies niet doen en mogen: want men sal raets plegen metter heyliger kercken doe arent dat hoorde doe bereide hi hem ende betaelde die beuaert