Van Arent Bosman: een mirakel dat geschiede int jaar 1433 in den lande van Cleve

¶ Ca. xxxiij.

[fol. d6v]

DOe sprac die geest watstu vragen wilste dat maect cort Ic sal varen in gods naem in groter vroechden sonder ende Doe vraechde arent waer sulstu varen int paradijs of inden hemel Die geest antwoorde Ic sal varen daer god adam ende eua voerde met sinen vrienden doe hise vuten voorbuchte vander hellen nam daer si sijnre verbeiden daer hi met hem ten hemel voer ende daer sal ic verbeiden x. dach na desen dach ende sal dan varen in dat derde choer der engelen daer sal ic dan sien dat ghebenedide minlike aensicht ons heren ihū x̄pi van ewen tot ewen Ende als ic daer comen bin so sulstu weder sien metten ogen die nv verduystert sijn van deser claerheit Doe vraechde arent echter na enen man die sijn vrient plach te sijn waer siin siel waer Die geest antwoerde Ic sach hem in dat choer daer ick in varen sal ende hi en hadde na der doot geen lange pijn hi was vij. vren inden vageuier ende quam daer na inden hemel Doe vraechde arent waer mede had hi die grote genade verdient hi was doch een ackerman ende moest wijf ende kinder besorgen Die geest antwoorde hi was oetmoedich bermhertich ende verduldich in alle sijn liden. ende sterf met groter begeerten tot gode Doe vraechde arent nae eenre vrouwen die lange tijt weduwe had geweest waer haer ziele waer Die gheest antwoerde si

[fol. e1r]

is int achste choer naest den meachden ende wort daer geeert met groter vroechden. want si plach die heilige kerke te eeren met hoer aelmissen ende cleinoden daer mede heeft si verdient datse geeert wort gelijc die pristers die god met innicheit hebben ghedient ende dicke misse deden van minnen tot gode ende niet van gebode. Die priesteren werden geset in teghenwoodicheit ons heren ihū xpī. want si dicwil haer becoringhe wederstaen hebben ende die wille gods volbracht hebben