¶ Capittel xxxij
DOe vraechde arent. hoe sal ic gesont werden an der zielen. Die gheest antworde hout die x. geboden. Ende wes oetmoedich barmhertich ende verduldich in alle liden ende hebt god lief bouen al. ende doet uwen euen mensch dat gi wout datmen v dede. doe seide arent mach ic wel slechte cleder dragen die geuerwet sijn sonder sonde. Die geest antworde Ist datter gheen houerdie in ghelegen en is of die oerde niet en verbiet te dragen Doe vraechde arent. wat is dat sekerste leuen te gode te comen Die geest antwoerde. dat een mensche van gueder gewoenten doechde doet ende god in sijnre herten draecht ende wanneert hem qualic gaet dat hi dan god anrope ende hem gebenedie. ende van ghewoenten wat guets segghe als god wouts of des ghelijcs als die mensche dan steruen sal so sal hem sijn goede ghewoente voor comen met dencken of met spreken so comen dan die heilige engelen ende ontfanghen hem in gods gewout. mer als die bose menschen steruen so comen hem voor sijn quade gewoenten so dat hi denct of dat seyt quaet is so comen de bose geesten ende ontfangen hem in hoer gewout: daerom salmen guet leren op dat ment van gewoenten mach houwen
Auteursrechtvrij