Van Arent Bosman: een mirakel dat geschiede int jaar 1433 in den lande van Cleve

¶ Capittel xxx.

DOe vraechde arent woustu datstu noch leuen mochtes Die geest antwerde. Ic woude veel lieuer bernen inden vageuier te domsdach toe als god oerdelen sal ouer leuende ende doden eer ic noch eens den doot lijden woude ende die veruaernisse die ic doe leet of ic weten mochte dan te gode te comen sonder veruaernis Doe vraechde arent waren oec veel geestelike menschen die oerden hebben in pijnen Die geest antwoerde Die geestelelike luden priesteren moniken en nonnen ende ander geestelike menschen die hoer oerden te recht houden en hebben na der doot geen pijn mer si moeten eerst alle pijn sien eer si te gode comen ende daer voertse die engel vry doer sonder pijne Mer geestelike luden die hoer oerden breken met houaerdie met ghiericheit ende met oncuyscheit die werden gepinicht sonder bermherticheit ist dat si daer geen penitencien voor ghedaen en hebben Doe vraechde arent hoe lange sal die werelt noch staen Die geest antwoorde dat en mach gheen geest weten dan god alleen. Ende inden hemel en is niemant die dat begheert

[fol. d5v]

te weten Doe god an den cruce sterf voor onse misdaet dat was midden in die werelt doe waren so veel menschen op der aerden geweest als na inder tijt sullen comen daer bij machmen merken hoe lange die werelt staen sal. Doe vraechde arent. Wanneer sal antekerst comen Die gheest antwoerde wanneer dattet god behaget so wert hi geboren ende van hem sal geschien als die propheten hebben gesproken in allen saken