Van Arent Bosman: een mirakel dat geschiede int jaar 1433 in den lande van Cleve

¶ Ca. xxix.

DOe vraechde arent: waerom quamstu op der aerden pine te liden ende niet inden vageuire. Die gheest antwoorde. doe ic van mijn licham scheiden soude. doe quamen die

[fol. d4v]

bose geesten ende deden mi condich dat ic in dootsonden waer ende en hadde geen biecht ghesproken ende namen mijnre zielen waer ende wouden mi in die helle voeren Doe quam die engel gods ende dreef die duuelen van mi so langhe dat mijn ziel van mijn lichaem scheyde Ende doe wert dat oerdel ouer mi ghegeuen dat ic int vagheuier wesen soude tijt sonder getal ende daer souden mi die bose geesten pinigen so langhe dat is ghenoech hadde gheleden Mer doe bat die reine maghet maria ende die heilige apostel sint iacob die meere onsen lieuen here voor mi so dat ic die opter aerden bleef ende leet daer die pine daer ic die sonden hadde gedaen dat ic niet dan een bose geest pinigen soude Ende het wert geuonnist van gode dat ic op ter aerden bliuen soude ende doe scheide mijn ziel van mijn licham Doe ontfinc mi mijn engel ende hadde mi node gelaten doch hi en mocht mi niet helpen ende gaf mi den bosen gheest die mi quaden raet plach te gheuen dat hi mi rein maken soude met groter pinen Doe vraechde arent. wat dienst hadstu ghedaen die reyne maget maria ende sinte iacob dat si voor di baden Die geest antwoerde Ic plach hoer auont te vasten te bier ende te brode ende horen dach te vieren bouen ander vierdagen ende nv heb ic voor den cleinen dienst groot loen ontfanghen Sinte iacob hadde

[fol. d5r]

ic vercoren tot eenre voorspraec inder tijt als ic storuen soude ende daer om eerde ic hem meer dan ander apostelen Ende so mach elc mensche gaerne een apostel kiesen die sijn voorspraec is in die vre sijns doots