Van Arent Bosman: een mirakel dat geschiede int jaar 1433 in den lande van Cleve

¶ Capittel xxviij.

DAer na vraechde arent. wat staet mocht ic best an nemen daer ick god alre behagelicste mochte wesen Ende die geest antwoorde In alrehande staet die in die heilighe kercke niet verboden en is machmen gode behaghelic werden Ende die geest sprac voort Het waer groot verdriet dat yemant een oorden an name die hi niet houden en mochte totten einde toe dat hem god haelde welc mensche een oerden an nemen woude ende wel weet dat die orden niet gehouden en wert vanden genen die daer in sijn ende nochtans die daer in gaet doet als die gene die een ander in een put volghet ende hem seluen mede verdrenct Dien waert beter dat hi die heilige echtschap aen name ende leefde vanden arbeide sijnre handen so soude hi bet te gode comen in dat choer der gherechter luden dan hi dat hoochste choer verdienen woude ende hielt die oerde niet Doe vraechde arent

[fol. d4r]

Comen oec wel ackerluden in pinen die doch groten arbeit doen Die geest antwoorde. dat is nadien dat si die x: geboden gods houden Ic hebbe wel ackerluden in pinen gesien mer niet veel inder meester pinen Die ruters ende rouers die hem plegen te verstoren die nemen oec haer sonden veel of. die hebben die meeste pijn: ende ic heb dootslagers gesien die veel luden met onrecht doot geslagen hadden die hadden oec alder luden pijne op hem die si doot geslagen hadden Ende die meeste pine hebben die gene die oerloghe op genomen hebben daer dorpen ende steden of verbrant worden ende die luden doot geslagen worden die saten dat meest deel in lucifers stede Die geest sprac voort: Ic hebbe oec alte grote pijn ghehat om bernens wille Doe ick xxx. iaer out was doe worde ic mede vut geboden op een reyse daer wi veel husen verbranden daer was ic altoes metten eersten ende stac die husen an Doe stac ic daer een huys an dat totter kerken hoorde daer die kerke mede van verbrande daer leet ic alte grote pijn om langhe tijt. want ic daer niet genoech voor ghedaen en hadde met penitencien