Van Arent Bosman: een mirakel dat geschiede int jaar 1433 in den lande van Cleve

¶ Capittel xxiij

HEt geschiede dat die henric vande gheest so cranc wert dat hem die meesters tlijf ontgauen Doe docht arent wat hi vanden gheest ghehoort hadde ende ginc tot henric ende seide hem dat hi niet steruen en sou van die siect en seide hem dat sake waer van die kinder storuen Ende doe hi een waer vant ende genas doe vierde hi voor meer die heilige dagen ende dede sijnen vader wat guets na ende sint heeft hem god meer kinder verleent die leuendich sijn gebleuen Ende henric bosman is sijn naem van des vaders wegen ende hi heeft vanden geest een teiken behouden. Doe vraechde arent Wreect god oec sinen heiligen sonnendach ouer der luden kinderen Die geest antwoorde Niet alleen ouer die kinderen mer oec ouer dat guet paerden koyen ende ander guet wreect god sinen heiligen sonnennach Daer en is geen ontschuldinge an of men spreket. wi willen ons coren op hopen gaen

[fol. c6r]

setten ende vintmen des sondages iet wachten wy tot dattet maendach is so wortet al niet Men en soude om alder werelt guet niet een gebodt gods breken ende al mochtmen daer so veel guets mede winnen als alle die werilt binnen heeft ende dan die mensche alle dat guet om gods wille gaue die mensche en mocht daer mede niet comen te gode hi en biechte eerst ende had berou voor sijn sonden Ende of een mensch waer die een gebot gods niet breken en woude al mocht hi alder werelt guet daer mede winnen dien mensche hadde god veel lieuer dan die dat gebod gods brake ende dat guet om gods wille gaue Ende dier trouwen en wil god niet langer ongeloont laten Doe vraechde arent: is die sondach meerre vierdach of die apostel daghe Die geest antwoorde. die opten apostel dach arbeit die sondicht so veel tegen tgebot der heiliger kercken of hi des sonnendaechs arbeide Ende die sonnendach is bouen die apostel dach. also god is bouen die apostelen Doe seide arent Ic woude datstu mi een teiken woudes geuen of ic yet van v seide datmen mi dat gelouen mocht: Die gheest antwoerde Het was mi noot dat ic mi openbaerde mer ten is mi geen noot teiken te geuen: Ic en wil di niet seggen dat tegen dat kersten geloue sal wesen wie des niet gelouen en can die sal wachten tot hi geloue vint. Ic en woude die geboden gods

[fol. c6v]

niet ghelouen. mer nv heb ic gheloef gheuonden Al dat kersten gheloef staet daer op dat men geloeft dat god is in des priesters handen bedect inder figuren des broots ende wijns So ist oec verdiente datmen geloeft god wonderlike werken dat hi almachtich is te doen. Tis noot datmen den woorden gods geloeft mer ten is geen gebot van god datmen die gheesten ghelouen sal: want het is ghescreuen. wie alle geesten geloeft die wert bedrogen This oec gescreuen. willen si den leuendighen proheten niet ghelouen si en selen die doden niet ghelouen Ende daer om en mach ic geen teyken gheuen doch ist di ende den ghenen die mi metti hebben gehoort in pinen ghenoech gheopenbaert dattu ende sy niet in groter pinen en coemt nader doot Doen seide arent mi heeft een mensche gebeden dat ic v vragen soude of een mensche een sonde ghedaen had die hi niet biechten en dorst of hi voor die sonde niet so veel doen en mocht datse god hem vergaue sonder biechten Die geest antwoerde dit is al een spel der duuelen so plach ic oeck te doen het is voor gode doot ende ten mach niet helpen ist datmen een priester crigen mach Al hadde een mensch alle sijn leuen wel gedaen ende dede opt leste een doot sonde ende sterf daer mede sonder berou ende biecht hij moest in die helle mer hi en soude mer een pijn

[fol. d1r]

hebben Ende een mensche die hondert doot sonden heeft gedaen die heeft oec hondert pinen inder hellen ende so loent ende pinicht god alle dinc na recht Ende daer en blijft geen dinc onghewroken dat quaet is noch geen duecht ongeloent