Van Arent Bosman: een mirakel dat geschiede int jaar 1433 in den lande van Cleve

Capit. xxij.

DOe vraechde arent. comen alle geesten te gode die opter aerden in pine sijn De geest antwoorde neen Ic kende enen man die plach arm luden te verdrucken ende besloech een gemeente in enen camp daer der arme luiden haue te weiden plach. Ende daer na sterf die rike man ende wert gepinicht op die camp .iij. iaer lanc so seer dat daer wonder scheen ende brande als een groot bussche ende na die iij. iaren wert hi begrauen in die helle Ende ic kende oec een man die boos was ende wert dootgeslagen van sijn vianden ende soude noch viij. iaer geleeft hebben eer hi gestoruen had ende was oec viij. iaer die hi geleeft soude hebben opten aerden in pine ende quam daerna in grote

[fol. c5r]

ander steden daer die luden oec plagen te sien wat daer waer Die geest antwoerde van iuden die een deel wel xl. iaer doot hadden geweest die malkander haer lant af gestolen hadden ende af gewonnen ende oeck ander saken hadden gedaen ende waren dmeeste deel opter aerden in pine daer si die sonden gedaen hadden Arent vraechde na enen riken man die sijn vrient plach te wesen ende had veel kinder gehat waer sijn ziele waer Die geest antwoerde. hi is in groter pinen ende sal na veel iaren te gode comen ende is somwile bi sijnen sone henric ende plach hem sijn kinder of te doden als si gedoopt waren Doe vraechde arent. waerom geeft god dien gheest die macht dat hi die kinderen dodet Die geest antwoorde als god den mensche plaecht dat is sijnre sonden schult of sijn ouders sonden dat sy hoer guet heeft: of het is des schult dat hem god tot hem hebben wil om die iij. saken plaecht god dic den mensch ende so ist oec met henric dat die geest sijn kinder dodet het is oec sijnre sonden schult ende sijnre ouderen hy en plach god niet te ontsien. hi plach gaerne knechten te hebben die des heilige dages aten voor die misse ende te velde voeren die hadde hi lieuer dan die vasten willen ende te kerken gaen ende hi en dede den gheest gheen guet na als hi schuldich is: want hi was sijn vader ende had

[fol. c5v]

hem groot guet gedaen Om dese sonden laet god den geest die kinderen doden ende heeft meer dan vij. gedoot als si kersten waren gedaen ende hi sal se al doden die sijn huysurou criget: ist dat hy geen penitencie en doet Ende die geest heeft oec die macht dat hi hem an sijn lijf tasten mach ende rueren hem eens dat hi so cranc sal werden of hi steruen soude mer hi en sal daer niet van steruen ende hi sal daer een teiken of behouden in siin lichaem