Van Arent Bosman: een mirakel dat geschiede int jaar 1433 in den lande van Cleve

¶ Capittel xxi.

DOe vraechde arent waer is v nichte die so plach te wichelen Die geest antwoerde sij is noch in pinen ende weet datse te gode comen sal. want si meende dattet geen wichelye en waer ende sy plach rechte biechte te doen ende onderwijsde den pastoer dat hi hoer orlof gaf te wichelen mer dat wert an hem seer swaerlic gepinichet. Ende die duuelen diemen hiet witte vrouwen of helhonden quamen tot haer ende seiden dat si die helhonden waren die onder die aerde wonen onder schone bomen

[fol. c4r]

ende rijsboschen ende noemden veel steden daer si in woenden Ende seiden haer dat si luiden waerschouwen soude dat si haer steden rein hilden so soudet hem wel gaen an hoor neringe ende dit dede si den luden cont Ende wie dat des geloefde dat die bose geesten daer waren ende. deden hem eer daer cregen si macht ouer. als hem dan die eer niet en geschiede so dede si die luden scade an hoer neringe ende an hoer kindere ende so gingen die lude dan nader wichelinge ende vraechden hoe dattet daerom waer want hoer neringe ginc te niet of hem kinderen was wat gesciet Soe sprac die wigeleerster Ic wilt besien hoet daer mede is So quamen die duuelen dan tot hoer ende spraken ons en wert gheen eer ghedaen hoer kinder hebben ons woninge onrein gemaect si souden des donderdaechs des auonts vroech te bedde gaen ende maken dat huis schoen ende bereiden die tafel met guede spijse die wy mochten eten dan sout hem wel gaen in alle saken. ende dat dede die wigelester den luden cont Als die luden dan dit deden so lieten sise van hoer verdriet. ende so cregen die duuelen die guede menschen in hoer gewout die si met ander saken niet crighen en mochten Ende alle die nader wichelien gaen of wichelie doen die gaen vut gods bescermnis int gewout der boser geesten: Ende want pastoer wichelie laet geschien in mijn kerspel die is oec inder du-

[fol. c4v]

uelen staet als hijt weet Doe vraechde arent wat geesten sijn die helhonden sijnt oeck duuelen Die geest antwoorde: het sijn al verstoten geesten ende sijn een deel vut lucifers choer ende des sijn si constiger wonder te doen Doe vraechde arent. wat boete is daer tegen dat sij den menschen niet en doen Die geest seide warachtich geloef dat god bouen al is daer machmen alle duuelen mede verdriuen Die duuel en mach den mensch niet meer doen dan hi verdient wanneer hi quaet geloue heeft of sijn vierte brect so laet hem god wat geschieden dat hi vieren moet want alle geboden der heiliger kercken moeten gehouden sijn voor of na met pinen