Van Arent Bosman: een mirakel dat geschiede int jaar 1433 in den lande van Cleve

¶ Ca. xx.

DOe vraechde arent sijn die missen van allen priesteren gelijc gehoort Die geest antworde God is daer gelijc groot ende machtich in elke misse mer si en sijn allen menschen niet gelijc guet gehoort Wanneer een mensche weet dat die priester tegen tgebot der heiliger kercken

[fol. c3v]

leeft die en is der zielen niet so guet als des reine priesters misse. want god gerne reine dyenaers heeft Ende als die priester sijn biecht gedaen heeft ende wil warige penitencie doen soe is die misse guet. Doe vraechde arent is dat oec der zielen guet datmen offert opten outaer Die geest antwoerde dat is aelmissen ende is der zielen ten mael guet metter missen als dat rechtuaerdich guet is ende daer na dattet offer guet is daer na ist oec voor gode guet. alst offer ij penningen is of een. Ende het is oec te beter dattet wert geleit opten heiligen outaer daer die heilighe missen tegenwoordich sijn Ende het is quaet datsi den offer niet en verdienen als si schuldich sijn met vigilien ende missen Ende als si des niet te doen en hebben so souden si dat om gods wil gheuen soe waren si los ende vry