Van Arent Bosman: een mirakel dat geschiede int jaar 1433 in den lande van Cleve

¶ Capittel xix.

DOe vraechde arent en deden di dijn kinderen gheen guet na Die gheest antwoorde Och dat was mij veel te clein. mer wat ic selue voor ghedaen hadde dat vant ic. mer ic hadde grote pijn om mijnre kinderen wil. want ick hadde hem groot guet ghelaten ende deylden dat ongelijck met groten kyue ende vergaten mijnre daer mede. Ende god gonde mi dat ic mi openbaerde dat mijn kinder weten mochten dat ic in groter pinen waer Doe hadde ic een nichte die plach te wichelen ende mijn kinder baden hoer dat si vernemen soude hoet met mi waer Doe antwoerde mijn nichte dat wil ic gaerne doen hi heeft dat wel op mi verdient Ende seide dat si mi soude vermanen weder te comen ende meinde dattet al met gode waer. Si had veel zielen te gode gebracht Ende inden woorden dat si mi vermaende weder te comen so quam die

[fol. c3r]

bose geest in mijn gelikenis als ic plach te gaen opter aerden ende liet of hi mijn cleder an hadde ghehat ende seide lieue nichte ic bin noch in groter pinen Doe sprac si Lieue neue waer mede mach men v helpen Doe antworde die bose geest Du selste mijn kinderen seggen dat si mi elcs een akensche beuaert gaen ende laten mi ix. zielmissen na doen ende die quatertemperen een iaer lanc vasten te water ende te brode ende geuen ix. witte almissen in die quatertempere Dit liet mijn nicht also doen mer ten halp mi niet wantet tegen tgebot der heiliger kerken was. Doe dat iaer om gecomen was quam die bose geest weder tot haer ende seide Lieue nicht het is al wel ghedaen nu vaer ic tot gode Ende dit dede mijn nichte mijn kinderen te weten dat ic te gode wesen soude so dat mi mijn kinderen geen guet meer na en deden mer doch dat ghemein gebet quam mi oec mede te stade mer ten quam mi niet so veel te stade als die zielen die hoer biecht gesproken hadden eer si steruen. Ende soe dic als een misse ghedaen wort daer had ic mijn deel of