Van Arent Bosman: een mirakel dat geschiede int jaar 1433 in den lande van Cleve

¶ Capittel xviij

DOe vraechde arent. hoe hiet die pastoer. Die geest antwoorde Ghijsbrecht is sinen naem god si sijn troost Doe vraechde arent is hi noch in pinen Die gheest antwoorde. Ya ende hi weet wel dat hi verlost sal werden na veel iaren anders is sijn pijn der hellen pijn ghelijc Doe vraechde arent waer mede heeft hi die grote pijn verdient. Die geest antworde hi heeft veel meer die werelt gedient dan god hi heeft die statuten der heiliger kerken dic gebroken. hi plach sijn kerspel quaet exempel te geuen met giericheit met oncuyscheit met arbeiden Hi plach te ghebieden datmen die heilighe dagen vieren soude mer hi brac die vierte selue ende dede sijn coren des heiligen dages in sijn schure voeren Ende alsoe seiden dan die luden: Ons heer die

[fol. c2v]

pastoer doet sijn coren in brengen wi willen oec so doen hi is ghierich ende oncuysch wi en connen niet beter wesen dan hi is hi waer oeck gerne te gode ende also leefden een deel luden van sijnre kerspel na hem ende sijn oec in sijnre pijnen Doe vraechde arent machmen den pastoer niet helpen vut sijnre pijnen. Die geest antwoorde men mach die pijn wel corten als ic v voor geseit hebbe met missen met aelmissen ende met ander aflaet