geest antwoerde Van mijnre houerdien wegen dat ic sterc ende ghesont was in mijn leuen ende out wert lxxxviij. iaer ende ic hadde groot guet nae der werelt loop ende daer of niet so vele om gods willen en gaf als ic sculdich was Ende wanneer ic in die kerk quam soe ginc ic sitten an die hoochste side of an dat hoochste einde ende sochte een sachte stede ende alsmen dat heilighe sacrament op boerde so knielde ic op een knie ende niet op beide knijen als ic schuldich was Ende wanneer men den naem ihesus of maria sanc ofte las so en neychde ick mijn hooft niet als ick schuldich was te doen Ic was rijc van waerliken rijcdom om drie saken Ic was warachtich in mijn woorden: mijn ya was mijn ya. mijn neen was mijn neen. Ende wat ic die heilige kercke schuldich was van tienden dat betaelde ic als ic woude datmen mi ghedaen hadde.
Ende doe ic noch een ionc man was van .xxx iaren doe was ic arm van tijtliker hauen ende plach alte groten arbeit te doen. mer ten woude mi niet helpen dat was mijnre sonden schult. Ick plach des heilighen daghes te arbeiden: ende wat ick te doene hadde van boden te senden. ende mijne comenscappen te doen dat dede ick alle op heylighe daghen
Auteursrechtvrij