Van Arent Bosman: een mirakel dat geschiede int jaar 1433 in den lande van Cleve

¶ Capittel xij.

ALs arent meer soude vragen so wert de geest so cranc dat hi niet meer spreken en conde ende rechteuoert voer hi heen wech En dat dede die geest wel tot negen stonden nae dien mael dat hem arent anderweruen hadde besworen ende alle pijn tot dat die leste missen waren gedaen Doe quam die geest des anderen auonts weder opten hof ende was ghestelt als een out man ende ginc bi arent opter aerden als een mensche Ende als arent voort ginc door die poerte so ginc die geest beneuen hem doer den tuyn ende en gaf geen gheluit van hem mer hi ginc daer doer als die sonne doer dat glas Daer om vraechde arent wat dat grote lichaem waer dat hi hadde Die geest antworde dat en is geen lichaem mer het is vanden vier elimenten des hemels.. Doe seide arent Hebstu geen lichaem. hoe mogestu dan soe schone spreken Daer op antwoerde die geest Des menschen sprake en is anders niet dan die geest des menschen. ende als die geest van des

[fol. b3v]

menschen lichaem is soe macht des te claere spreken Ende een geest die gheen pijn en heeft can alle sprake wel verstaen ende is so snel als een ghedachte. ende is so sterc als een dinc dat niet vergaen en mach hoe veel die ziel ghepijnicht wert als dije pijn een einde neemt so is sij weder gesont. Ende alle geschiede dingen sijn haer bekent Ende alle scrifturen ende prophecien van propheten dat sy nochtans ongeleert geweest heeft in haer leuen. Doe vraechde arent na enen man die sijn oudeuader gheweest hadde waer sijn ziel waer. Die geest antwoerde. sij is daer sij sculdich is te wesen My en is niet gheorloft van allen geesten te spreken. mer alleen van mi seluen wes men mi vraget Doe seide arent. want ghi niet van v seluen en hebt dan gods wille. soe segt mi. Ist gods wille van minen oudeuader ende van andere zielen daer ic v nae vraghe waer dat sy sijn inden hemel of inder hellen. Doe antwoerde die gheest. Ick can wel segghen wat god wil. mer wes hi niet en wil en mach ick niet seggen. Dijn oudeuader is inden vagheuier. ende sal te gode comen. ende weet wel hoe langhe hi te lidene sal hebben ist dat hem gheen guet na en wert ghedaen daer sijn pijne mede vercort wert want alle die ghene die

[fol. b4r]

dat heilighe sacrament nemen ende den heylighen olye int leste haers leuens met warachtighe berou ende bichte na hoer macht die en sellen van gode niet gescheiden werden inden ioxnsten daghe. mer si mogen wel comen in den vageuier na ghelegentheit horer sonden