Van Arent Bosman: een mirakel dat geschiede int jaar 1433 in den lande van Cleve

¶ Ca. xi.

DOe sprac arent ende vraechde waerom openbaerdestu di mi eerst als een hont ende niet als een mensche Daer op antwoerde die geest Int eerste van mijn leuen doe leefde ic als een hont ende niet als een mensche Doe ick in mijn xx. iaer was doe worde ic oncuysch ende leefde na mijnre genoechten in veel sonden ende plach oec te eten des sonnendaechs voorder missen ende plach veel te dansen ende niet veel te kercken te gaen Ende doe ic xxx. iaer out was doe nam ic een gheechte huysvrouwe ende leefde doe wat meer als een mensche. Ende daerom openbaerde ic mi eerst als een hont ende na als een mensche Ende hebbe daer oec wat pijnen of ende oec van houerdyen ende. van spele die ic te doen plach Ende die geest sprac voordan Ic hadde alte grote pijne doe ic eerst ghestoruen was vander sonden daer lucifer om vut den hemel geworpen wort ende noch meer om ander sonden Mer die pine ginc te hant vut ende en duerde niet lange. want icse wel ghebiecht hadde ende woude daer nochtans penitencie voor gedaen hebben hadde ic langher

[fol. b2r]

gheleeft Doe seide arent wat sonden waren dat daer lucifer om vuten hemel viel Die geest antwoorde Houerdie ende haet daer ic oeck grote pijn om hebbe gehadt ende noch hebbe Doe ick xxx. iaer out was doe word ick houerdich ende bleef houaerdich wel xxx. iaren eer ick penitencie dede. Doe vraechde arent wat was die houaerdie Die geest antwoorde. Ick liet mi verwaendelic cleden ende liet mijn schoene met lange tappen maken Ende ic dede mi enen roc maken met verwaende cnoppen Ic liet couelen met veel sterten maken Ende ic woude metten meesten ghesien wesen na der werelt loop Ende ic hadde mi oeck daer toe ghegheuen dat ic der duuelen spel plach te spelen dat was dobbelen ende worptafelen ende dit hadde ic wel vij. iaer ghedaen na dat ic mi bekeerde Ende hadde ict noch een iaer ghedaen soe soude mi god hebben laten doot slaen opten spele ende soude dan ewelic verdoemt hebben gheweest Doe vraechde arent. wat sondaren worden alder meest verdoemt Die geest antwoorde dootslagers dobbelaers woukenares roeuers ende die in ouerspel gheleeft hebben die liden sonderlinghe groote pijne ende voort ander sondaers nae dat si groot in sonden sijn. Ende by sondere dye haer eyghen kinderen dooden ende vele dier ghelijcke die

[fol. b2v]

worden meest verdoemt ende voert woeckenaers ende houaerdigen menschen om oncuische menschen Doe vraechde arent wat is woeker. Die geest sprac. Wat die heilighe kercke woecker hout dat is voer gode woeker ende soe wie die heilighe kercke te rechte te banne doet dat is voer god inden ban Ende so wie die heilige kercke met rechte absolueert die is oec voer gode geabsolueert Doe vraechde arent sijn daer oec wel so grote sonden diemen niet beteren en mach Die geest antwoerde dat een mensche god anuerweruen hadde gecruist woude hi van gode genade hebben god woudse hem gerne geuen Ende wat priester dat des sonders sonden niet horen en wil ende geuen hem raet na sijne macht die vertorent god meer dan of hi hem anderweruen cruyste Doe vraechde arent isser oec ontfermherticheit na die doot. Doe antwoerde die geest nader doot is rechtuaerdicheit ende inden leuen is bermherticheit Doe vraechde arent Hoe mach hem een mensche best voor sonden wachten ende bewaren: Die geest antwoerde daer op Swigen ende wiken wachten van sonden dat is dat best Soe waer die dobbelspelen sijn daer selstu wiken of daer yemant waer die dijnen doot gesworen hadde. want die doot der sielen is inden dobbelspel ende voert in ander spelen daer god mede vergeten wert. Ende

[fol. b3r]

alle die gene die dobbelspel of ander spelen ophouden daermen gelt mede wint ende daer god mede vergeten wert die worden dootslagers an lijf ende an ziele ende worden dan ghepijnicht metten sonden die wrake ropen inden hemel