Van Arent Bosman: een mirakel dat geschiede int jaar 1433 in den lande van Cleve

¶ Capittel x.

DOe ghinc arent weder thuis ende verwonderde zeer dat die geest aldus weder gecomen was Doe vraechde arent of hi noch in pinen ware. doe sprac die geest ic hebbe noch grote pijn ende sal duren noch vi. sonnendagen tot die missen al gedaen sijn Doe vraechde arent waer waerstu den eersten nacht doe du vanden lichaem gescheiden waerste Die gheest antwoorde op die stede daer mijn huysvrou sterf daer wert ick yerst gepijnt nader doot. daer had ic mijn gelt staende onder mijn bedde doe ic mijn huisvrou tegraue brocht ende was in groten rouwe Doe gingen som van mijn kinderen ende namen mijn ghelt. des ic so groten rouwe had dat ic mijnre sinnen wat quijt wert van rouwe ende wert so cranc dat ic mijn leuen daer mede cortede v: iaer lanc die ic noch langer geleeft soude hebben dat ic penitencie hadde gedaen ende waer dan salich ghe-

[fol. b1r]

storuen Doe vraechde arent waer sijn di ghebleuen die dijn gelt stalen. Die geest antwoorde Si sijn in groete pijn ende ropen wee wee Doe sprack arent ic woude v gerne veel vragen Die geest antwoerde du mogeste vragen wat du wilste van cleinen dinghen. want grote dinghen en sijn di niet bekent: Doe vraechde arent om wat sonden hebstu dus lange in pinen geweest. Die geest antwoerde om drie sonden wil Doe ic xx. iaer out was doe dede ic een sonde met oncuyshede die wrake inden hemel riep ende en hadse van scaemte niet gheheel vut gebiecht datse die priester niet en conde so groot verstaen als si groot was. Ende ick hadde enen mancken soen die trouwede een arms mans dochter ende behielse tot enen wiue dat keerde ic lange tijt dat si niet in echtschap en saten ende had gerne gesien dat hise gelaten had ende had eens rijcs man dochter genomen. doch mijn soen behielse tegen minen wil ende god wert sijn hulper also dat hi meer eren ende guets gewan nader werelt loep dan mijn ander kinderen ende dit en woude ic niet voer sonde achten so datter seer an mi gepinicht is Ende ic hadde xii. gulden ontfangen van enen man in sijn testament die soude ic arme luden gegeuen hebben om gods willen mer ic versuymde dat wel xxij. weken eer ic geuen woude ende het worde mi mede gestolen met minen gel-

[fol. b1v]

de Ende om dese iij. sonden heb ic so grote pijne geleden dattet niet te spreken en is. Ende om des gelts wille moetstu die aelmissen geuen Ende die geest sprac voort en hadde ic geen sonde daer om ic noch in pijne waer