Van Arent Bosman: een mirakel dat geschiede int jaar 1433 in den lande van Cleve

¶ Capittel ix.

DOe sprac arent het sijn veel lieden die seggen dattu gheen warachtich geest en biste. ende dattet tegen tgheloue is diet geloeft. Doe sprac die geest. Dat yerste punt vanden geloef is. Ic geloef in god den vader almachtich scepper hemelrijcs ende aertrijcs hi is almachtich ende bermhertich soe en ist geen wonder dat hi een geest sijn pijn laet

[fol. a8r]

corten Doe vraechde arent hoe bistu an dese genade gecomen dattu di openbaerste meer dan ander geesten Doe antwoerde die geest dat ic mi openbaer in dese kerspel dat en geschiet niet om mijne verdienten wil mer om ander saken die god bekent sijn ende ten mach alle geesten niet gescien dat sy hem openbaren nader doot: want nader doot is rechtuaerdicheit. quamen daer vele zielen weder so souden veel bedrieghnissen werden vanden bosen geesten het is gesproken van gode. En wilt alle geesten niet gelouen Doe vraechde arent waerom heeft god di mi laten toecomen ende niet enen anderen die di naerre waer: Doe sprac die gheest dat is dijn vaders schult. doe ic steruen soude had ic hem seer lief ende hi was mi seer trou gout ende siluer dat gaf ic hem dat hi des wat om god geuen soude ende dat ander tot sijne noodorft houden doe sterf dijn vader eer hi dat betaelde ende had hi noch geleeft so soude hi mi wel geholpen hebben met missen ende aelmissen Doe sprac arent heeft mijn vader oec pine om dat hi dat niet en betaelde eer hi sterf hi had doch groot guet Die geest sprac Ya hi heefter grote pijn om gehat wel xxx. jaer ende heeft geropen wee den genen die hem verhopen op haren eruen doe seide arent mach miin vader oec behouden wesen die Die geest sprac Ya hi wanneer een man sterft die hem xxx. gulden schuldich was ende daer voer wil di hi hem enen quaden ende valschen eet sweeren laten

[fol. a8v]

dat hi hem niet sculdich en waer Doe seide dijn vader Ic en wil geenen valschen eet voer mijn gelt ganc thuis ic wilt gode beuelen die ontrou die du mi doetste Ende die man sal dijns vaders pijn liden tot sijnre pinen voer de xxx. gulden ende dan is dijn vader wel betaelt Inden woerde als arent meer vragen soude wort die geest zere suchtende als een cranc mensche die in sijn doot bedde leit ende ghinc van arent als een roock vanden vuer.