Van Arent Bosman: een mirakel dat geschiede int jaar 1433 in den lande van Cleve

¶ Dat vij. Capittel. Hoe dat arent noch tot aken soude gaen.

ALs die missen alle waren ghedaen ende die aelmissen oeck gegeuen waren so ghinck arent weder om thuys. Ende soude

[fol. a6v]

twee beuaerden tot aken gaen. Doe ginc hi op den hof om te vernemen vanden geest of hi alleen te aken soude gaen. doe quam die geest als een groot man als hi plach te comen ende sprac tot arent eer hi hem vraechde. du sulste een ghesel met di hebben die metti tot aken sal gaen ende wanneer du rede. biste si is hi oec rede: Ende als arent dochte in sijn sinne wat hi den ghesel te loen soude geuen. antwoorde die geest op arents gedachten als hi veel plach voer ende na ende seide Du selste bi hem doen in allen saken als du wildes dat hi di dedede ofstu hem gedient hadste in sulcker maten ende so sulstu oec opten wege doen Du en selste dinen euen mensche op ten beuaerts wege anders niet ouer segghen dan du woudes dat hi di dede Ende als gi wat copen wilt so moechdi wel dingen sonder argelist mer betaelt dat gi sculdich sijt Ende wanneer dus misse mogest horen die hoort emmer Ende als gi tot aken gecomen sijt so hoort misse ende geeft offerhande al daert gewoenlijc is van kaersen ende van aelmissen totten outtaer Dit dede arent ende sijn gesel ende offerden ij. clein kaersen ende offerden gelt totten outaer ende gauen oec den armen om gods wille Arents geselle was des pastoers broeder van meyeric ende woende te kolen ten apostolen met sinen broeder ende was geheten henric Ende die pastoer seide

[fol. a7r]

sinen broeder te meyeric opt hof dat hi vernemen soude hoe dattet metten geest waer daer henric zeer lief toe was op dat hi wonder sien mochte Ende doe hi opten hof quam veruaerde hi hem niet voer den geest als ander liede die arent daer bi hadde die wtermaten zeer vreesden Ende dye geest quam ende openbaerde hem henricus ende arent ende dede hem te weten dat henricus met arent tot aken soude gaen ende wesen sijn gesel Doe seyde arent sijn heer en heeft hem geen orlof gegeuen vorder te gaen dan op desen hof Doe sprac die geest hi heeft orlof: want sijn here gerne sage sijns kersten luden best ende moet oec reden daer of gheuen