Van Arent Bosman: een mirakel dat geschiede int jaar 1433 in den lande van Cleve

¶ Capittel vi.

OP dese selue tijt lerede die geest arent als hi wat verloren hadde dat hy dan enen geest verclagen soude die oec opten houe in pij-

[fol. a6r]

nen ware ende soude aldaer so lange pine liiden datmen tot aken dat heilichdom lestwerf toent ende dan sal hi tot gode comen Ende dat hadde die geest verdient om dat hi opten houe pelgrims gheschent had inder aeckscher vaert die te vij. iaren om comt Ende dus heeft arent den geest verwacht als hem noot was. Ende arent en mach anders den geest niet vragen dan hem aen ginge als hem die voorscreuen gheest verboet op sijn v. sinnen. want hi te mael boos waer om grote pijn die hi hadde Ende als arent den geest te lagen plach soe quam hi met groter haesticheit als eens menschen stemme ende anders so en sach hi niet Ende den geest lade arent met iij. woerden die hem die ander voerscreuen geest leerde Soe geschiedet dat arent opten weghe van sint iacops tot compostelle wel drie hondert milen vanden houe dat arent xiij. gulden werden gestolen des nachts vut sine clederen Soe laechde arent den geest ende die geest was daer binnen een ogenblic ende bescheide arent soe dat hi sijn gelt weder creech.