Van Arent Bosman: een mirakel dat geschiede int jaar 1433 in den lande van Cleve

¶ Capittel v.

DEse missen worden gedaen als vanden geest voersproken was arent ginc te kolen tot ygelic priester so hem die geest had geseit ende vraechde wat si nemen wouden van die missen ende seide hem alle de saken vanden geest Doe seide een ygelic priester dat hi gaue wat hi woude si woudense gerne doen ende arent gaf hem dat gelt also die geest gesproken had ende gaf oec die aelmissen mer doe hi die aelmissen soude betalen en had hi niet dan half dat gelt doe proefde arent wel dat hem dat gelt benomen was eer hi wt ghinc. Doe cost arent broot met der helft vanden gelde ende gaf dat om god ende ginc weder thuys opten hof Doe quam die geest ende sprac. En bedroefdi niet om dat gelt mer ganc morgen als die zonne op gaet ende so wie die eerst toe coemt ende heeft een bile inde hant die heeft dat gelt in sijn kiste in een roden budel ende hi waert gerne quijt ende geeft hijt gerne weder so en melt hem niet anders soutmen nae rechte ouer hem

[fol. a5v]

rechten ende die man quam so die geest geseit had Arent ginc des morgens opt velt. ende die man quam ende woude dat gelt weder neder leggen daert geleghen had Doe sprac arent hoe quaemste aen dit gelt Die man seide Ic hoerde dat gelt clincken doen ghij dat in die kiste leit ende die kiste bleef op staen doe woude ic sien watter waer ende die bose geest bedroech mi ende ic namt Doe arent dit gelt weder hadde ginc hi weder totten geest vragende hoe hijt voort soude maken. Doe sprac die geest ganc te kolen totten backer daer du om ij. gulden broot weder coftes ende gif hem dat ghanse gelt dat hi di daer broot om gheue ende dan ist wel betaelt want hi is een rechtuaerdich man Ende ganc voort tot heer ian den pastoer ende segt hem dat hi die iiij. missen van onser vrouwen wel gedaen heeft ende heefter v. gedaen Arent dede also ende dede dat broot geuen ende ghinc totten pastoer ende seide hem vanden missen dat se wel gedaen ende betaelt waren dat hi geen sorge meer en hadde Doe sprac die pastoer God si geloeft ende den geest ewige rust Ick dede .v. missen op datter te beter waer want wi alle gebreclijc sijn.