Van Arent Bosman: een mirakel dat geschiede int jaar 1433 in den lande van Cleve

¶ Capittel iiij.

DOe ghinc arent thuys ende ghinc te negen vren opten hof. Doe quam die geest ende arent sloech voer hem dat teken des heiligen cruys ende sprac Ic beswere di bose geest die daer biste metten kersten geest biden vander biden soen ende biden heiligen geest datstu van desen kersten geest rumes ende met dien woerden werp arent dat wijwater opten geest Doe gaf die bose geest een veruaerlic gheluit als een donreslach ende gaf vut vuer als een blixim ende arent wert so seer veruaert dat hi neder viel op die aerde ende was van hem seluen: ende als hi dus een wiil gelegen had sprac hem de kersten geest an ende seide arent stant op ic wilt di nu seggen des noot is doe quam

[fol. a4v]

arent weder wat tot hem seluen. ende sprac met grooter anxte en beuinge waer mede mach ic di helpen Doe sprac de geest met alte volcomenre woerden ende seide Du selste mi xxx. missen laten lesen iiij. van die rene maget maria v. siel missen .ix. missen van die ix. choren der engelen ende xij. vanden xij. apostelen Ende du selste mi ij. beuaerden doen tot aken die ic sculdich was van beloffte doen ic sterf Ende dus selste gode ter eren ende mi te hulpe so veel aelmissen geuen als ons here ihūs xpūs wonden hadde doe hi anden cruce sterf Doe sprac arent ic en weet niet hoe vele dater wonden was Doe seide die geest Du selste nemen xxvi. reynoldus gulden ende iiij. witte kotlscher penningen ende ganc te kolen ende coeper broot mede ende gif een ygelic arm mensche een broot van een koels moerken ende dan is der aelmissen genoech. Ende gaet voor die kerc daer die arme liede die aelmissen bidden ende geeft daer dit broot ende die xxx. missen sul di oec te kolen laten doen Du selste gaen totten predicaren ende alstu in dat cloester coemste den eersten priester die du sieste. laet die v. sielmissen lesen ende geeft hem vii. koels witte penningen Daer na ganc tot die minrebroederen totten gardiaen ende laet hem lesen die ix. missen van die jx. choren der engelen ende gif hem ix. witte penningen Dan so gaet tot onser vrouwen broederen daer

[fol. a5r]

dat grote schoon beelde staet van onser vrouw inder capellen ende welc priester daer misse leest dien laet lesen die xij. missen vanden xij. apostelen ende geeft hen xij. koels wit penninghen. Doe sprac arent ons pastoer begeerde der missen oec wat om gods willen te doen. Die gheest seide laet hem die iiij. missen van onser vrouwen lesen