Van Arent Bosman: een mirakel dat geschiede int jaar 1433 in den lande van Cleve

¶ Capittel iij:

TEn laetsten ghinc arent te kolen ouermits rade der

[fol. a3v]

priesteren dat hi den doctoren om raet vragen soude Doe en conden die doctoren genen raet gheuen na dien dat die geest besworen was ende sijn gebrec niet en openbaerde. Doe arent van kolen gesceiden was ende op dat velt quam bi der stad geheten duseldorp. doe quam hem een priester teghen gecleet met witten clederen ende was so scoon dat niet te seggen en is Ende arent wert veruaert ende van wonder en dorst hi niet den priester ansien. Doe sprac die priester tot arent hebt gueden troost Ic wil di seggen hoe du den gheest helpen suls metter hulpen gods Doe sprac arent sijn v die saken kundich hebdijt mi te kolen horen seggen. doe sprac die priester Ia ic Het is die geest van henrick bosman ende die bose geest en laet hem sijn gebrec niet segghen Du sulste gaen te meyderic ende morgen opten heiligen sonnendach misse horen van tbegin totten einde ende gaen so vroech in die kerck als die priester wijwater geeft ende als die misse vut is so nemt des wiwaters wat met di ende ganc binnen der selfder nacht opten hof ende besweer den bosen geest dat hi den kersten geest laet vut sijnre gewelt ende met dien woerden so werp dat wiwater op den geest so sal die bose geest rumen en die kersten geest sal di sijn gebrec seggen met dien woerden bleef die priester staen ende sprac gaet thuys

[fol. a4r]

ende doet so ic di geseit heb. Doe bleef arent noch staende ende woude meer vragen Doe seide die priester ghanc thuis du en selste niet meer vragen du selste met den naem ihū xpī alle dinc verdruien Doe en woude arent noch niet gaen ende woude hem noch meer vragen Doe sprack die priester anderwerf ende oec derdewerf ganc ende doet so ic di gheseit hebbe. ende alstu gedaen hebste dattu sculdich biste dan spreken wi wel te samen Doe ginc arent een weunich voort ende sach om mer doe was die priester wech. Doe sach arent wel dattet een mirakel was van gode. want binnen dien tijt en conste hem geen mensche verbergen