Van Arent Bosman: een mirakel dat geschiede int jaar 1433 in den lande van Cleve

¶ Capittel. ij.

DOe ginc dese arent totten pastoer te meyeric geheten heer ian van dislaken ende claechde hem dese sake als hi dit had gedaen. Doe sprack die pastoer het is een geest du selste hem besweren Doe seide arent dat en can ic niet doen van veruaernis Het gesciede ten laesten op sinte benedictus auont inder vasten dat arent spade opten hof was doe quam die geest ende voerginc arent ende ginc hem so na of hi hem neder trecken woude Doe arent sach dattet immer wesen moest doe bleef hi staende ende sprac Ic gebiede di geest van der macht gods ihū x̄pi dattu mi segste diin gebrec Die geest antwoerde Vander macht ihū cristi wert ic een creature ende met dien woerden wert die geest verwandelt van des honts gedaente ende scheen doe te wesen als een groot man ende sprac met haesscher stemmen gelijc of hi een cranc mensche geweest hadde Ic bin een geest van een kersten mensch als du bist Ic was dijns vaders oudeuader ende was geheten henric bosman Ende voert met dien woerden wort die geest stenende ende

[fol. a3r]

verghinc als een menschen scheme. Daer nae opten derden dach quam die geest weder op ten seluen hof ende openbaerde hem arent in groter pinen met suchten ende met kermen ende was gelijc een mensche ende sijn cleder doncker grau alsmen inder nacht besien conde ende waren der aerden te mael ghelijc ende sprack tot arent met groter haesticheit. Souct raet ende cort mi mijn pijn Ende met dien woerden wort arent die geest quijt dat hy hem niet en conde vragen wat hem van node waer ende soe quam die geest dicwil weder tot arent ende ruysschede bi hem opter aerden ofmen rysen lancs der aerden getogen hadde. Ende quam oeck int huys daer arent was ende scudde dat huys dat beefde also dat bernaert bosman ende fye sijn wiif vanden bedde op stonden ende hadden anxt dat hi thuys omme werpen soude Ende seyden arent dat hy op stonde ende ginc tot wise priesteren om hulp ende raet Met arent en conde daer gheen priester bi crigen die hem dorst helpen. Ende aldus quam die geest alte vele ende dreef wonder: want die bose geest en liet hem sijn gebrec niet seggen ende alsoe was arent in groten noot ende sijn moeder ende ander vrienden waren seer bedroeft.