Van Arent Bosman: een mirakel dat geschiede int jaar 1433 in den lande van Cleve

[fol. a2r]

¶ Hier begint een mirakel dat geschiede int iaer ons heren M.cccc. ende xxxiij. in die maent nouember in een dorp geheten meyeric inden lande van cleue bi een stadt genaemt doesborch
Capittel: I.

DAer was gestoruen een rijck man in voerleden tiden ende hadde doot geweest xl. iaer xij weken min ende was ghenaemt heynric bosman ende plach een ackerman te wesen Nv machmen horen wat die bermhertige god heeft laten openbaren Het geschioede op sinte mertijns auont dat een ackermans zoen die paerden vuter weyden soude halen ende dat was een ionc knecht van xv. iaren ende sijn naem was gheheten arent bosman ende woende met enen ackerman geheten bernart bosman Ende het geschiede des auonts doe de zonne onder ghinc dat arent bosman een dinc tegen quam in eens groten honts gelikenisse ende was van gedaente of hi inden drec omgewentelt hadde geweest ende sijn haer was vael ende drang op desen arent bosman of hi hem biten woude Doe bleef arent staende ende wort seer veruaert ende sloech voer hem dat teiken des heilichs cruys. Doe bleef die geest staende ende stan als een cranc mensche ende arent ghinc sijnen wech Ende daer na quam die geest dicwijl tot arent als een hont ende stan te male lude Dit duerde wel xix. weken dat arent ter weken eens

[fol. a2v]

of tweewerf dese figure sach ende wert so zere veruaert als die gene wel betugen die des oec een deel met hem sagen ende hoerden als met een namen bernaert bosman ende fie sijn wijf ende henric hoer knecht ende die prior van ophenegraue ende is een carthuser ende meester inder godheit ende meer ander liede