Het Antwerps liedboek. Deel 1. Teksteditie

[p. 458]

204 Een nyeu liedeken van Borbon

[Commentaar]

1
O God van Hemelrijcke,
Wat druc is ons gheschiet,
Die Borgoensche alle gelijcke!
God behoede Borbon voor tverdriet,
Twas so vromen capeteyn,
Dien hebben wi verloren,
Den eedelen heere reyn!

2
‘Menich slach heb ick ghesleghen,
Te peerde ende oock te voet;
Groote victorie heb ick ghecreghen
Ter eeren den Keyser soet.
Menich leet heb ick den coninc gedaen
Daer hi quam al voor Pavien:
Daer en mocht hi mi niet ontgaen.

3
Melanen hebbe ick inghenomen
Met menighen crijschman vry;
Die paus hadde dat vernomen,
Die sandt hem groot volck by.
Si meenden mi wel af te slaen,
Die Veneetsianen quamen mede:
Mer ten was haer niet wel vergaen!

4
Heel Ytalien heb ick bedwonghen
Ter eeren van den Keyser fier;
Roomen heb ick bespronghen,
Daer ben ick ghecomen int dangier.
Het ghebuerde al in den tweesten slach:
Daer ben ick deerlijcken doorschooten,
Daert so menich man ansach.

5
Och adieu Kaerle lieve neve!
Het moet nu ghescheyden zijn.
Nu moet ick u begheven,
Want het scheyden doet mi pijn.
Ic waende met u te winnen dat Heylich Lant:
Nu moet ic ommer sterven,
God blijve nu dijn onderstant.

[p. 459]

 

6

 

Adieu ghi edel heeren bouwe!

 

Adieu graef Joris van Sassen goet,

 

Weest toch den Keyser ghetrouwe,

 

Dat bidde ick, vry edel bloet.

 

Adieu viceroy de Napels vry,

 

Nu moet ick van u scheyden:

 

Gods barmherticheyt staet mi by!’

 

 

 

7

 

Die heeren weenden seere,

 

Si hadden groot verdriet

 

Al om Borbon den heere,

 

Dat hi so droeflijck schiet.

 

Die knechten maecten groot misbaer,

 

Si en wisten wat bedrijven:

 

Deen vranck sijn handen, dander trac zijn hayr.

 

 

 

8

 

Ons troost hebben wi verloren

 

Ende oock ons toeverlaet!

 

Ick bidde Jhesum uutvercoren

 

Dat Hi zijn siele ontfaet.

 

Ghetrouwen dienst heeft hi ghedaen;

 

God sal een ander verwecken

 

Die den Keyser nu sal bistaen.

 

 

 

9

 

Wi moghen wel bedrijven rouwe

 

Om Borbon, den capeteyn goet,

 

Ende voor Wassenaer ghetrouwe:

 

Hi heeft oock ghestort zijn bloet

 

Ter eeren den Keyser, dat is waer!

 

Men mocht gheen getrouwer vinden

 

Dan dese twee, int openbaer.