Het Antwerps liedboek. Deel 1. Teksteditie

[p. 460]

melodie Souterliedekens 1540b, ps. 67

[p. 461]

205

[Commentaar]

1
Rijck God, wie sal ic clagen
Mijnen druck en my verdriet?
Hier en is niemant ten daghen
Die my oock bystant biet.
Dies lijdt mijn herte rouwe
En daertoe groote pijn:
Lief, de ick u ontrouwe,
Soe waren die schulden mijn.

2
Eens sjaers stond ick int herte
Van een reyn vrouwelijck graen;
Nu lyde ick pijne ende smerte
Omdat ick ben uutghedaen.
Van row mijn ooghen leken
En lyden groot verdriet:
Ick sie, ick ben versteken,
Ken weet die cause niet.

3
Niet, trouwen lief, wilt hooren
Altoos na vrienden raet.
Ick en bender niet toe gheboren
Om te comen in sulcken staet.
Mijn goeyken is te cleene
Nae duwe, reyn maechdelijn fijn,
Dus leet mijn herteken in weene,
Omdat ic om tgoet ballinc moet zijn.

4
Och goet, ghy doet my quelen
En lyden groote pijn!
Ick ben nu een te vele
Daer ick willecome plach te zijn.
Dus gae ick achter lande
Als een man desperaet:
Lief, dit dunct my wesen schande
Dat dat goet voor liefde gaet!

5
Wat dinghe heb ick bedreven
Teghen u, reyn maechdeken soet,
Dat ghy my wilt begheven
En worpen onder de voet?
Dies moet my therte trueren
Ende lyden pijne groot;
Sou dit noch langher dueren
Ic waer veel liever doot.

6
Al ben ick dus bedroghen
Met u, reyn maechdelijck saet,
En valschelijc beloghen:
Het compt by uwer daet.
Sprack ick te naer u eere
- Segt my, maechdeken coen! -
Anders dan duecht ende eere
Als ghy moecht u selven doen?

7
Ten had my niet ghespeten
Al tleet dat ghy my doet,
Hadt ghy my niet verweten
Dat ick was te cleyn van goet.
Daerom dat ic sal mincken,
Schoon lief, die trouwe van dijn,
Ick salder noch langhe om dincken
Alst u vergheten sal zijn.

8
Oorlof, reyn creatuere,
Die eens was die liefste mijn!
Meyndy, dat ick sal trueren
Alst moet ghescheyden zijn?
Neen ick, bloem verheven,
Van u neem ick den keer:
Al hebdy my begheven,
Schoon lief, men vinter meer!