Het Antwerps liedboek. Deel 1. Teksteditie

[p. 392]

melodie Souterliedekens 1540b, ps. 135

[p. 393]

174 Een nyeu liedeken

[Commentaar]

1
Al ben ic van den scamel ghesellen,
Y, nochtans so willic vrolic zijn!
Van thienen, van vieren, so wil ict stellen
En drincken den hupsen coelen wijn.
Hi! Laet ons drincken en clincken
En laet ons maken den dobbelen haen!
Mijn keelken moet wijnken drincken,
Al sou mijn voetken baervoets gaen!

2
Wel eten, wel drincken, dat doet mi specken;
Verstaghet al mijnen sin:
Een potteken drincken, een potken lecken,
Daer staet al mijn leven in!
Hi! Laet ons drincken en clincken
En laet ons maken den dobbelen haen!
Mijn keelken moet wijnken drincken,
Al sou mijn voetken bervoets gaen!

3
Met luilic wercken en vromelic broesen,
Daer hanghet al mijn leven aen;
En wijnken drincken met dobbelen croesen,
Dit doen ic altijt waer ick can!
Hi! Laet ons drincken en clincken
En laet ons maken den dobbelen haen!
Mijn keelken moet wijnken drincken,
Al sou mijn voetken barvoets gaen!

4
Sinte Noywerc heb ic vercoren
Tot mijnen alderbesten patroon.
Ic heb hem dapperlijc hulde ghesworen,
In leechdom eer ic zijnen persoon!
Hi! Laet ons drincken en clincken
En laet ons maken den dobbelen haen!
Mijn keelken moet wijncken drincken,
Al sou mijn voetken barvoets gaen!

5
Sinte Luyaert heb ic omghedraghen
En Sinte Noywerc heerlic gheviert.
Ic hebse ghedient, bi nachte, bi daghen:
Sinte Reynuyts heeft mi bestiert!
Hi! Laet ons schincken en clincken
En laet ons maken den dobbelen haen!
Mijn keelken moet wijnken drincken,
Al sou mijn voetken barvoets gaen!

6
Dus ben ic vast te schepe gheseten
Int luysich schip van Sinte Reynuyts
En metter ghilde mijn daghen versleten,
Dus geeft mi elcken toch wat cruyts.
Hi! Laet ons scincken en clincken
En laet ons maken den dobbelen haen!
Mijn keelken moet wijncken drincken,
Al sou mijn voetken barvoets gaen!

7
Oorlof, Bacchus, prince ghepresen,
Ic vaer te Platteborsse, na mijn hol!
Oorlof, lieve prince te desen,
Ic drinc so gheerne mijn buycxken vol!
Hi! Laet ons scincken en clincken
En laet ons maken den dobbelen haen!
Mijn keelken moet wijnken drincken,
Al sou mijn voetken bervoets gaen!