Het Antwerps liedboek. Deel 1. Teksteditie

[p. 382]

melodie Souterliedekens 1540b, ps. 31

[p. 383]

170 Een amoreus liedeken

[Commentaar]

1
Uut liefden, siet,
Lijde ick verdriet.
Ic en macht ooc niet uutspreken
Hoe dat si hiet
Diet herte doorschiet,
Twelc Venus heeft ontsteken.
Noyt smert so groot!
In desen stoot,
Wie soude den cloot genaken?
Reyn roosken root,
Troost mi, tis noot,
Eer ic den doot sal smaken.

2
Ick ben doorwont,
Sijt des oorcont,
In tshertsen gront met liden.
Nochtans, haer mont
Ende borstkens ront
Can mi terstont verblijden.
In tswerelts troon
Door haren toon
Spant si den croon der vrouwen.
In desen hoon,
Haer dienaers loon,
Wie soude die scoon betrouwen?

3
Liefs woorden soet:
Voor ghelt, voor goet,
Want lief bi lief moet bliven.
Noch vint men goet,
Dat troosten doet,
Twelc liefde doet verdrijven.
Mer dees kersou,
Daerop ick bou,
Is bi geen vrou te ghelijcken.
Derf ic den dou
Ick sterf van rou...
Schoon liefken, trou moet blijcken.

4
Laet hoop mijn
Vertrooster zijn,
Schoon roosemarijn gepresen,
Soet medecijn,
Eer ick verdwijn,
So is mijn pijn ghenesen.
Mer weyghert zijt,
Gheen meerder spijt,
Mijn herte dat splijt doort derven...
Vermalendijt
Si ure oft tijt,
Ic roepe, ic crijt om sterven.

5
Ist haer behaecht,
Eer ghi lof draecht
Haer si bevraecht met smeeken.
Ic hebt ghewaecht,
Tsi Gode gheclaecht!
Dus hoort de maecht eerst spreken.
Loppe niet verblint
Al teghen wint,
Oock niet en mint met ooghen,
Mer wel versint
Eer ghi mint,
Eer ghi u vint bedroghen.

6
Met oorlof reyn,
Siet, int gemeyn,
Ic blijf alleyn in smerte.
Ic prijs dat greyn
In swerelts pleyn,
Si blijft alleyn int herte.
Si is eerbaer,
Haer bruyn oochskens claer,
Al sonder maer gheschepen.
Een ure van haer
Is duysent jaer...
Tblock valt swaer te slepen.