Het Antwerps liedboek. Deel 1. Teksteditie

[p. 294]

melodie Souterliedekens 1540b, ps. 79

[p. 295]

128 Een nyeu liedeken

[Commentaar]

1
O lustelike mey, ghi zijt nu in saisoene,
Schoon ende groene,
Die vogelkens singen nacht ende dach.
Dies ic wel mach,
Sonder verdrach,
Aensien reyn ooge-opslach
Van mijn lief coene:
Haer liefde macht mi veel te doene.

2
Int velt staet menichte van bloemen,
Wie soudese sommen?
Hoe lustelic dat gersseken uuter aerden spruit,
Loof ende cruyt
Gheeft nu virtuyt!
O mijnder herten juyt,
Verblijt den dommen,
Een troostelic woort laet, lief, van u commen.

3
Schoon lief, ghi zijt die liefste creatuere,
Mijns levens duere
Blijve ic gestadich tot in mijn doot.
Reyn lief minjoot
Troost mi, tis noot,
Die mijn herte doorschoot.
Reyn maget puere,
Om uwen troost ist dat ic labuere.

4
Schoon lief, ghi acht mijn woordekens cleene,
Dies ic in weene
Blijve, met drucke so seer doorwont.
Ghi zijt diet doet,
Schoon beelde soet,
Verhuecht sin ende moet.
Met uwen troost reene
Worde ic verblijt door u alleene.

[p. 296]

 

5

 

Princersselic greyn, wien ick geerne aenschouwe,

 

Blust mijnen rouwe,

 

Laet mi, arm dienaer, troost ontfaen.

 

Reyn vrouwelijc graen,

 

Hoort mijn vermaen,

 

Laet mi in u gracie staen,

 

So sal ic met trouwe

 

U dienen, lustelijcke vrouwe.