Het Antwerps liedboek. Deel 1. Teksteditie

[p. 234]

melodie Souterliedekens 1540b, ps. 36

[p. 235]

102 Een nyeu liedeken

[Commentaar]

1
‘Ic heb om eender vrouwen wille
Ghereden so menighen dach.
Nu segt mi, scoon vroudelinge,
Hoe sidy nu bedacht?
Och, wildi bi mi bliven
Ende dat segt mi nu ter tijt,
Want ick moet van hier
- Ja, schoon is mijn lief -
Mi en lust gheen ander wijf.’

2
‘Lust u gheen ander wijflijn?
So draecht u herte tot mi.
So segghen al die lieden
Dat ick die liefste si.’
‘Die eere wil ick behouwen
Tot die alderliefste mijn!’
‘Ende slapen bi scoone vrouwen?’
- Ja, schoon is mijn lief -
‘Daer slaept een ander bi!’

3
Hi nam die suyverlijcke
Al bi der witter hant.
Hi leydese also verre
Al over die smale padt,
Al voor haer camerveinster.
Daer lach de maecht en sliep.
Die wachter op hoger tinnen,
- Ja, schoon is mijn lief -
Hoe luyde mer dat hy blies:

4
‘Is daer yemant verboorghen?
Dat segt nu ter tijt!
Dat hem die niders niet en verspieden
Die bi der liefster zijt.
Ic sie die morghensterre
Ende den dach die spruit daerby,
Ic hoor die vogelkens singen,
- Ja, schoon is mijn lief -
Daertoe die nachtegale.’

5
‘Laet singhen wat si willen!
Ten is noch gheen dach.
So moetse God bewaren,
Daer ic te nacht bi lach.
Si heeft twee valckenoogen,
Daertoe eenen huebscen crans.
So moet ic van haer scheyden,
- Ja, schoon is mijn lief -
God spaerse lange ghesont!

6
Hiermede heb ic ghecosen;
Het is mi van herten leet.
Ick hebbe om uwen wille
Ghereden so menigen dach.
Schoon lief, laet u gedencken,
Ende die trouwe die ic u gaf
Ende laet u twee bruyn ooghen op mi wencken
- Ja, schoon is mijn lief -
Adieu, ic scheyde van hier.’