Het Antwerps liedboek. Deel 1. Teksteditie

[p. 186]

melodie Souterliedekens 1540b, ps. 109

[p. 187]

80 Een nyeu liedeken

[Commentaar]

1
Het ghinghen drie gespeelkens goet
Spaceeren in dat wout;
Si waren alle drie bervoet,
Den haghel ende snee was cout.

2
Die een die weende seere,
Die ander hadde huebschen moet,
Die derde begonste te vraghen
Wat heymelijck boelschap doet.

3
‘Wat hebt ghi mi te vraghen
Wat heymelijck boelschap doet?
Het hebben drie ruytersche knechten
Gheslaghen mijn lief ter doot!’

4
‘Hebben drie ruytersche knechten
Gheslaghen u lief ter doot,
Een ander boel sult ghi kiesen
Ende draghen huebschen moet.’

5
‘Soude ick een ander boel kiesen,
Dat doet mijnder herten so wee.
Adieu mijn vader ende moeder,
Ghi en siet mi nemmermeer.

6
Adieu mijn vader ende moeder
Ende mijn joncste susterkijn!
Ick wil gaen ter linden groene,
Daer leyt die alderliefste mijn.’

7
Die dit liedeken dichte,
Dat was een ruyter fijn.
Sinen buydel was seer lichte,
Daerom drinct hi selden wijn.