Het Antwerps liedboek. Deel 1. Teksteditie

(2004)–Anoniem Antwerps liedboek– rechtenstatus



[pagina 164]
melodie Adriaenssen 1584, f. 60v

[pagina 165]
71 Van den visscher [Commentaar] 1 Het voer een visscher visschen, So verre aen ghenen Rijn. Hi en vant daer niet te visschen, Dan een huebsch maechdelijn. 2 ‘Och visscher,’ seyde si, ‘visscher, Waertoe dracht ghi uwen moet?’ ‘Al totter huebscher deerne, Dat dunct mi wesen goet!’ 3 ‘Och visscher,’ seyt si, ‘visscher, Dat visch hebt ghi ghevaen! So verre aen geen groen heyde, Daer ist goet visschen gaen!’ 4 ‘Aen gheender groender heyde, Daer leyt dien couden snee. Daer vriesen mi handen ende voeten, Mijn hooft doet mi so wee!’ 5 ‘Vriesen u handen ende voeten, Doet u hooft so wee? So gaet al in der stoven, Daer en vrieset nemmermeer.’ 6 Mer doen die loose visscher Al in der stoven quam, Doen bestont hi haer te vragen Na haren getrouden man. 7 ‘Wat hebt ghi mi te vragen Na mijnen getrouden man? Mijn man is al in der kercken, Hi bidt Gods heylighen an!’ 8 ‘Is u man al in der kercken? Oft in den coelen wijn? So laet ons eten ende drincken Ende laet ons vrolijck zijn!’ 9 Mer doen si saten ende aten, Doen quam haer eygen man. Doen docht die loose visscher: ‘Hoe come ick nu vandan?’ 10 Dat vrouken was behendich, Si goot haer vischsop uut. Doen spranc die loose visscher Ter hoochster veynsteren uut.