Het Antwerps liedboek. Deel 1. Teksteditie

[p. 118]

melodie Souterliedekens 1540b, ps. 24

[p. 119]

53 Een amoreus liedeken

[Commentaar]

1
Ghestadighe minne draghe ic altijt,
Dies lijdt mijn herte pijn.
Mocht ic noch zijn van haer verblijt,
Hoe vrolijc soude ick zijn.
Tot haer soude ick mi keeren,
Gheen ander lief begheeren,
Want si is die alderliefste mijn.

2
Ist niet een druckelijc leven
Te derven die ick minne?
Ick hadder mi toe begheven,
(Ic en was niet dan een kint)
Ic dedet in corter uren
Dat ick langhe moet besueren...
Eylaes, ick was so seer verblint.

3
Doen ick laeste met ooghen aensach
Die mijn herteken heeft bevaen,
Doen was ic vrolijc nacht ende dach!
Ende nu ist al ghedaen:
Van haer ben ic gescheyden,
Alle druck moet ic verbeyden,
Ick mach wel truerich gaen.

4
Mijn schip is mi ontdreven,
Minen ancker en leit niet vast.
Mijn lief heeft mi begeven,
Recht als een onwaert gast.
Eylaes, this buyten minen schulden,
Nochtans moet ic mi verdulden,
Al in mijn hert lijde ic verdriet.

5
Die dit liet heeft ghestelt,
Dat was een ruyter van droefheyt,
Sijn lief is hem onthelt.
This haest genoech gheseyt:
‘Eylaes, van haer is hi gesceiden,
Allen druck moet hi verbeyden...’
Is hi niet genoech ghequelt?