Het Antwerps liedboek. Deel 1. Teksteditie

[p. 114]

melodie Hs. Doornik, f. 21

[p. 115]

51 Een oudt liedeken

[Commentaar]

1
Gheldeloos, ghi doet mi pijn,
Al mijn vruecht doet ghi verdroogen.
Ick soude so gaerne vrolijc zijn,
Woudt mijnen buydel ghedooghen!

2
Het was mi van tevoren gheseyt,
Ick en wouder niet na hooren,
Hadde ick een pennincxken wechgheleyt,
Dat mochte ick nu oorboren!

3
Ick plach te sitten op die bierbanck,
Waer is den tijt ghevaren?
Al buyten sweechs leyt mijnen ganc,
Niet hebben doet veel sparen!

4
Doen ic goet geldeken had in mijn tas,
Doen ghinc ic metten goey ghesellen.
Mer nu mijn ghelt is al verteert,
Nu moet ic boomkens tellen.

5
Wanneer ic in die taverne come,
Ter tafelen ben ic haest geseten;
Dan make ic mi van achter uut,
Dat die goey ghesellekens niet en weten.

6
Pot ende kanne, het is al verteert.
Waer sal icx meer gaen halen?
Die vrouwe die mi te borghen plach,
Die moet ic nu wel betalen.

7
Eten ende drincken is mijn motijf,
Te sitten metten vollen balghe.
Als ict ghebrenghen can int lijf:
Voor die dore en staet gheen galghe!

8
Het was mi van tevoren gheseyt,
Ic salder noch langhe op dincken.
Als ic mijn buycxken hebbe ghevult,
So gae ic te Walem drincken.