Het Antwerps liedboek. Deel 1. Teksteditie

[p. 105]

46 Een nyeu liedeken

[Commentaar]

1
Fortuyne, wilt u keeren,
En valt mi niet so suer,
Ende ick blijve al int verseeren,
In lijdens swaer doleur.
Mijns liefs regeur
Dat valt mi nu so snel,
Verdraghen moet ick leeren
Door dese nijders opstel.

2
Rijck God, wie sal ick claghen
Meer dan die liefste mijn?
Nu ende tot allen daghen
Sal ick u ghetrouwe zijn,
Stout ende fijn,
Spijt die nijders overal,
Sal ic u goede jonste dragen
Totdat ick sterven sal.

3
Wanneer ic op haer dincke,
So verandert alle mijn bloet.
Ick soude gaerne schincken
Mijn lijf ende alle mijn goet
In u behoet:
Wilt danckelijc ontfaen.
Laet in u herte dencken:
Ick en sal u niet ontgaen.

4
Adieu schoon roosebloeme,
Scheyden dat moet nu zijn
Totdat ick wedercome,
Die alderliefste mijn,
Totdat ick wederkeere.
Adieu lief gracieus,
Adieu mijn lief, mijn eere,
Die waertste coragieus.

5
Schoon lief, zijt mi getrouwe,
Ick en gheere anders nyet.
Troost mi of ick verflouwe,
Als ghi mi in lijden siet,
Hoort na mijn bediet.
Als ic u niet spreken en mach,
Doet dat ick u aenschouwe
Tot op een ander dach.