Het Antwerps Liedboek. 87 Melodieën uit 'Een schoon liedekens-boeck' van 1544. Deel 1. Liederen
(1975)–Anoniem Antwerps liedboek–
Auteursrechtelijk beschermd
[pagina 76]
| |
Ga naar margenoot+ Een oudt liedeken1.
‘Het daghet inden oosten,
Het lichtet overal.
Hoe luttel weet mijn liefken,
Och, waer ick henen sal.
Hoe luttel weet mijn liefken...’
2.
‘Och warent al mijn vrienden
dat mijn vianden zijn!
Ick voerde u uuten lande,
Mijn lief, mijn minnekijn.
Ick voerde u uuten lande...’
3.
‘Dats waer soudi mi voeren,
Stout ridder wel gemeyt?
ic ligge in mijns liefs armkens
Met grooter waerdicheyt.
ic ligge in mijns liefs armkens...’
4.
‘Ligdy in uus liefs armen?
Bilo, ghi en segt niet waer!
Gaet henen ter linde groene,
Versleghen so leyt hi daer.
Gaet henen ter linde groene...’
5.
Tmeysken nam haren mantel
Ende si ghinc eenen ganck
Al totter linde groene,
daer si den dooden vant.
Al totter linde groene...
6.
‘Och, ligdy hier verslaghen,
Versmoort al in u bloet?
dat heeft gedaen u roemen
Ende uwen hooghen moet.
dat heeft gedaen u roemen...
7.
Och, lichdy hier verslaghen,
die mi te troosten plach?
Wat hebdy mi ghelaten?
So menighen droeven dach.
Wat hebdi mi ghelaten...’
8.
Tmeysken nam haren mantel
Ende si ghinck eenen ganck
Al voor haers vaders poorte,
die si ontsloten vant.
Al voor haers vaders poorte...
| |
[pagina 77]
| |
9.
‘Och, is hier eenich heere
Oft eenich edel man,
die mi mijnen dooden
Begraven helpen can?
die mi mijnen dooden...’
10.
Die heeren sweghen stille,
Si en maecten gheen geluyt.
dat meysken keerde haer omme,
Si ghinc al weenende uut.
Ende si ghinc wederomme...
11.
Si nam hem in haren armen,
Si custe hem voor den mont
In eender corter wijlen
Tot also menigher stont.
In eender corter wile...
12.
Met sinen blancken swaerde
dat si die aerde op groef;
Met haer snee witten armen
Ten grave dat si hem droech.
Met haer snee witte armen...
13.
‘Nu wil ic mi gaen begevenGa naar margenoot+
In een cleyn cloosterkijn
Ende draghen swarte wijlen
Ende worden een nonnekijn.
Ende draghen swarte wijlen...’
14.
Met haer claer stemme
Die misse dat si sanck,
Met haer snee witten handen
dat si dat belleken clanck.
Met haer snee witte handen...
|
