Het Antwerps Liedboek. 87 Melodieën uit 'Een schoon liedekens-boeck' van 1544. Deel 1. Liederen
(1975)–Anoniem Antwerps liedboek–
Auteursrechtelijk beschermd
[pagina 64]
| |
Van Thijsken vanden Schilde1.
Ga naar margenoot+ Het is goet pays, goet vrede in alle duytsce landen,
Sonder Thijsken vanden Schilde:
Hi leyt te Delder ghevanghen.
Hi leyt ghevangen so swaerlijck op zijn lijf.
2.
Die vrou al vanden Scilde, si lach op hooger tinnen.
Si sach die heeren, die borghers comen binnen.
Si en sach daer Thijsken, haer liefste boele, niet.
Si en sach daer etc.
3.
‘Ghi ruyters, ghi rovers, ghi heeren vander straten,
Waer hebdi Thisken vander Schilde ghelaten?
Waer hebdi gelaten die liefste boele mijn?
Waer hebdi’ etc.
| |
[pagina 65]
| |
4.
‘Och vrouken vanden Schilde,
Nu en laet u niet verlanghen,
Dat Thijsken vanden Schilde te Delder leyt ghevanghen,
Hi leyt’ etc.
5.
Dat vrouken vanden Schilde en woudes niet ghelooven.
Si dede haer paerdeken sadelen ende toomen.
Si reedt te Delder al voor dat hooghe huys.
Si reedt etc.
6.
‘Och Thijsken vanden Schilde, dats bistu nu hier binnen,
So steect u hoofdeken al uut der hoogher tinnen.
Laet mi aenschouwen u fiere jonghe lijf.
Laet mi’ etc.
7.
Thijsken vanden Schilde en liets hem niet verdrieten.Ga naar margenoot+
Hi liet zijn hoofdeken ter hooger tinnen uut schieten,
Hi liet haer aenschouwen zijn fiere jonghe lijf.
Hi liet etc.
8.
‘Thijsken vanden Schilde, ghi en wout my niet ghelooven
Dat ghi bi daghe, by nachte soudt laten u ruyten, u rooven,
Dat ghi soudt laten u rooven ter halver middernacht.
Dat ghi’ etc.
9.
‘Ja vrouken vanden Schilde, dat quam by uwen sculden,
Dat ghi wout draghen dat silver ende root gulden,
Dat ghi wout draghen dat roode beslaghen gout.
Dat ghi’ etc.
10.
‘Och Thijsken vanden Schilde, haddy dat woort ghesweghen.
Met silver ende roode gout had ick u op doen weghen,
Dat u nu sal costen dijn fiere jonghe lijf.
dat u nu sal costen’ etc.
11.
‘Och vrouken vanden Schilde, en soude u dat niet verdrieten
dat mi die raven, die voghelen souden eten,
Dat mi souden eten so menich clein vogelken?
dat mi souden eten’ etc.
12.
‘Och Thijsken vanden Schilde, en laet u niet verlanghen.
Ick sal u radeken met rooskens ombehanghen,
Daer op sal rusten dijn fiere jonge lijf.
Daer op’ etc.
|
