Antwerps liedboek
(2001)–Anoniem Antwerps liedboek–
Auteursrechtelijk beschermd
[Folio 125v]
| |
Wy lansknechten wel ghemoet
dry Vendelijn wy vernamen
Elck in een slachoorden stoet
Op een schutgewerte waren wy geuoert
daer in die walen waren beroert
Wi creghen ghenuchte int schieten
Te Wyle dat die Walen liepen
3
Die Franchoysen als cloecke mannen
Quamen ons cnaphendich aen
meest wt Vlaenderlant ghebannen
Sy meynden ons hebben gheuaen
Si riepen her her Wi toochden den rug
Tot dat wi quamen aen een brugghe
daer vonden Wy ons hooftman staende
Sijn twee vendelijn niet af gaende
4
Met .xx. vendelijn van twee syden
Quamensy als dulle lien.
Om tegen ons te strijden.
Wi mosten voor haer vlien
die Fransche ruyters ontdecten tvelt
daer waren wi met die Fransoysen gequelt |
Si moghen haer wel schamen
dat si .xxx. teghen een quamen
5
Wi weken in corter wylen
Tot aen een water stranck.
Het quartier van eender mijlen
Noch vlogen ons vendelijn blanck
daer toochde elck ruyter wat hi was
Wi schoten die Fransce ouer haer harnas
In dat water sachmer vele ghenesen
Si mosten geherdoopt wesen
6
Och Hertoghe van Vendome
Bistu een onredelick man
dat ghi ons wildet comen
met so vele Vendelijn an
den Arent sal noch die Lelie ontdoen
Al hebdi genoechte voor de noen
Wy comen noch in tyden
Om in Vranckerijck te verblijden
7
Lansknechten wilt v verblijden
Om te trecken in Vranckerike bloot
Van v Hooftman en wilt niet scheyden
| |
[Folio 126r]
| |
Al soudy daer blijuen doot
Met v Hooftman v leuen leen
En aen gheen water van hem scheen
Al gader totten scouweren inne.
Hi volcht v tot sinen brunen kinne
8
Die dit Liedeken dichte
Hy waer gaerne een Lantsknecht
Hi steldet al opt slichten
Te Rumegem int gheuecht
Sinen naem was Hansken sonder ghelt
Daer was hi metten Fransoysen Gequelt
Ick segt v sonder falen
In Vranckerijck sal Hi zijn scade verhalen
|
|