Antwerps liedboek

209 Een nyeu liedeken

1
WIe wil hooren een goet nieu liet
dat van twee goey Lijnkens is gesciet
Men singhet voor een cluyte
Sy deden dat haer Vrou Venus riet
Sy ghinghen metten naeyecorf uyte

2
Ick quam ghereden al door een lant
Daer ick twee ionghe vroukens vant
Spelende al op die luyte
Sy ghinghen te samen eenen ghanck
Sy ghinghen metten naeykorf uyte

3
Tot grietkens van brusel sat ic en dranc
Met mijn schoon Lijnken op de banc
Het was een roosken van virtuyte
Wi ghinghen tsamen eenen ghanck
Wi ghinghen metten naeykorf uyte

4
Och naeien is so goeden dinc
Aylacen het brenct veel sorghen in
Dat mijn herteken sluyte

[fol. 121r]

 

Al zwelt mijn buycxken niet te min

 

Metten naye korf gae ick uyte

 

 

 

5

 

Naikorf naikorf reyn maechdelijn.

 

Altoos wilt ghi gedragen zijn.

 

Bi gildekens metter fluite.

 

Tsmorgens vroech inden coelen wijn.

 

Ende tsauonts metten naeiekorf uyte

 

 

 

6

 

Des morgens als ic laet op staen.

 

Vroech wil ic ter kercken gaen.

 

Met mijnder scheeuer tuyte.

 

Als ic wijwater heb ontfaen

 

So gaen ick metten naeikorf uyte

 

 

 

7

 

Ic lach in een prieel geuaen.

 

Eylacen dat heeft mijn naeyen gedaen.

 

Ic hielde mi inde muyte.

 

Mocht ic op tsheeren straten gaen

 

Noch ginck ick metten naeikorf uyte

 

 

 

8

 

Die dit liedeken eerstmael sanc.

 

Was een geselleken vander banc.

 

Hy schoyde gelijc een guyte.

 

Hi nam zijn Lijnken metter hant

 

Hi ginc met haer metten naeicorf uyte