Antwerps liedboek

(2001)–Anoniem Antwerps liedboek– rechtenstatus


208 Een nyeu liedeken 1 WY moghen wel louen en dancken den tijt die dees ghenuechte doet bedrijuen Ick hebbe consent al van mi wijf Te spelen tot den vijuen Ick lach daer ouer op beyde mijn knien doen seyt si de vou gaerde homme de bien. 2 Het snuchtens als ick op gae staen Ick leyde mijn wijf ten asemente Ick leytse al in haer camerken Ick helptse stellen al op haere gente ic houde den spiegel daer si haer hair ap doet dan segt si man van eeren weest ghegroet 3 Ick wassche ick backe ic vage den vloer. Ick doe dat werc al vanden huyse
[Folio 120v]
Ic sette dat kint op mijnen schoot Dan vraghe ick vanden gruse Als ick dat doe dan eest al goet dan segt si man van eeren weest ghegroet 4 Het snuchtens als die clocke achste slaet. Dan gae ick maken den pottagie Ick leyde mijn wijf ter kercken waert Spreect si mi toe ic weer mijnen hoet dan segt si man van eeren weest ghegroet 5 Ten geeft mi geen wonder al lijde ic druc Al gae ick al siende met smallen caken Fortune en biet mi gheen gheluck Aen tvoore woonen en can ic niet geraken Ick lach daer ouer op beyde mijn knien Doen seyt si de vou gaerde homme de bien 6 Oorlof prince op dit termijn Wi moeten floicx van hier scheyden Ick hebbe een wijf so quaden wijf Den duyuel die moet haer gheleyden Segghe ic ia mijn wijf seyt neen \| dan seyt si dieu vou gaerde homme de bien.