Antwerps liedboek

195 Een nyeu liedeken.

1
IN Iunius den .xx. dach
den Prince van Araengien te velde men sach
Met menighen vromen lantsheere
de Ghelderse verstoorde sonder verdrach.
Hi behaelden daer oock prijs ende eere

2
Des princen meynen was op dat pas
Hensberch te victalieren ras
Hi de alle monucie bereyden
Wie dat ruyter noch lantsknecht en was
Moeste wten bourgoensen legher scheyden

3
De gelderse quamen tegen der nacht
En hebben eenen losen alarm gewracht
Met ontrent vijfhondert peerden
Mer de bourgoense zeer wijs bedacht
Dorstense wel aenueerden

4
Smorghens ontrent dagheraet
Is den Prince getrocken met sinen staet
Met vijfthien hondert peerden
daer ouerste af was my wel verstaet

[fol. 111v]

 

Graue Willem van Vorstenborch van weerden

 

 

 

5

 

Als die gelderse dat vernamen

 

Dat die bourgoense ane quamen

 

Met die victaille waghens ghepresen

 

Met dry slachoorden sachmense versamen.

 

Wt hen cuylen quamen sy midts desen

 

 

 

6

 

De Prince viel die gelders dapper an

 

Ende haer schade van menighen man

 

Ten cost die bourgoense niet verdrieten

 

Veel vanden boeren sachmen als dan

 

Het bloet ouer die schoenen vlieten

 

 

 

7

 

Die van hensberch zijn ooc wt ghesprongen

 

En hebben onder den hoop geclongen

 

Met bussen ende cortouwen

 

Si hebben die geldersen so bedwonghen

 

Si en mochtent daer niet langher houwen

 

 

 

8

 

Die geldersen vernamen dit rumoer

 

dat daer wert versleghen so menighen boer

 

Al van die bourgoense knechten

 

Si riepen gelt gelt dou vertwijfelde loer |

 

Of wy en willen der ia niet vechten

 

 

 

9

 

Van gelt en was daer gheen gherucht

 

Voor de bourgoense hadden sy ducht

 

In Wassemborch zijn si gheweken

 

Na Rueremunde namen sy ooc de vlucht

 

Die bourgoense volchden op haer streken

 

 

 

10

 

Pauwellioenen tenten en Victaille net

 

Met .xv. groote stucken reyn opgheset

 

Buspoeyer en daer toe clooten

 

Hebben de bourgoense met beckenelen gescept

 

Ten heeft haer niet Verdroten

 

 

 

11

 

God en den Heere sint Andries

 

Die wil bewaren dat gulden Vlies

 

Voor alle verraderyen

 

Voor hinder of schade of eenich Verlies

 

Nv en tot allen tijden