Antwerps liedboek

190 Een nyeu liedeken.

1
HOort menschen hier gheseten
Int borgoensche crijt
die vromelijc drincken en en eeten
en bedreuen iolijt
Om dat ons Keyser nv wort benijt
Ende so vromelic strijt dies zijn | wy verblijt
Wi dancken al tsamen god gebenedijt

2
Menich herteken was int benauwen
Int borgoensche pleyn
Om dat Gelder en Cleefsche landouwen
En die Gulkenaers cleyn
Spraken van onsen Keyser vileyn
Ende seyden certeyn al tsamen ghemeyn
dat hem die cabbeliauwen hadden in

3
Een herte vernedert van gheeste
In gods toe verlaet
Niewers hem en maect de meeste
Wert verheuen iaet
Maer die hem verheft hoort menschelijc saet
Wert vernedert quaet het blijct aent misdaet
Vraget Willem van Guilic die geuangen gaet

4
Die coeruoorsters spraken te rade
Aen ons Keyserlijck graen
Oft hy Willem niet in genade
Soude willen ontfaen
Ons Keyser en wilde aen sulc vermaen
gheen hant aen slaen hi wilde weten saen
Waer om dat hy den Arent was af gegaen

5
Die coeruoorsters elck ander in stade

[fol. 109r]

 

Gingen Willem beuroen

 

Ende spraken eert is te spade

 

Hoort hier Cleuenaer coen

 

trec in Keysers handen op dit saisoen

 

In der velden groen als geuangen baroen

 

En op diet v rieden wilt v ontschult doen

 

 

 

6

 

Nv en sal prophecie niet liegen

 

Hoort al hier naer

 

Alle loosheyt en bedrieghen

 

Wert nv openbaer

 

Tis so misselic wiet berocket heeft

 

En dus heeft gesneeft vry lelie nv beeft

 

Wi dancken god dat onsen Keyser noch leeft

 

 

 

7

 

Gelder Cleef en Guylic die landen

 

Recht vry ongespaert

 

Begeren onder ons Keysers handen

 

Te sijne bewaert

 

Wilde hyse ontfangen als Keyser vermaert

 

Si zijn vol vaert nae den vroemen libaert

 

Hi wilse met brabant hollant hebben gepaert

 

 

 

8

 

O princelijc prince verheuen

 

Karolus coragieus

 

Van ws gelijcken en was noit ghescreuen

 

Noch soe victorieus

 

Het buycht al voor ons keyser valiant |

 

Doer gods crachtige hant den Torcxen tirant

 

wilt god ons keiser sal besitten sijn lant