Antwerps liedboek

186 Een nyeu liedeken

1
GHi chrijslieden alle te samen
Sijt vrolijcken in die weer
die Geldersce mogen haer wel scamen
dat si ons comen heer
Om hensborch te winnen was haer motijf.
Het heeft hen ghecost so menich lijf
En al tot haer verlanghen
Het en conde haer niet wel verganghen

2
Die wachters hoorde ick reden
Ghi lantsknechts maect v in die weer
Meynaert met sinen lammen leden
die comt ons voor Hensborch heer
Hi brengt met hem so menighen man |
Ghi chrijslieden wiltse schouwen an
Ende verdienen prijsen
Nae oude lantsknechten wijsen

3
So haest als wi vernamen
Ende horden des wachters woort
Wi lantsknechten al te samen
Maecten ons al op die poort
Men sach daer gheen crijsknecht troeren.
Het dochten ons meest geldersche boeren
Wi boden haer goeden morghen
Ende schooten daer in sonder sorghen

4
Eenen brief is ons ghecomen
Met eenen bode al op dat pas
daer in dat wi vernamen
dat Meynaert haer ouerste was
Och hertoch Willem hooch gheboren man
Is uwen raet aen Meynert van Ham
Merten van Rossum en sulcke reden
Si brenghen v om landen ende steden

5
Bode keert wederom tzo velden

[fol. 106r]

 

Dat gheuen wi voor den besten raet

 

Segt Meynaert dat hi laet zijn schelden

 

En sien wat in sinen boesem gescreuen staet

 

Hi begheert van ons dese stercke stadt

 

Schaemt hi hem niet wi weten wel badt

 

Wilt hi ons crijghen leeren

 

Een crijch vorst hebben wi tot eenen heere.

 

 

 

6

 

Hi begheert een antwoort schriftelick

 

Dat dunct ons wesen so vreemden spel

 

Met spiesen ende met cortouwen ende dier gelic

 

Hebben wi leeren schriuen wel

 

Daer hebben wi menighen lantsknecht by

 

Si schrijuen so dapper met pulner en bly

 

Wilt ghi die brieuen lesen

 

Van die pocken sullen wi hem ghenesen.

 

 

 

7

 

Op eenen morghen si ons beleyden

 

Op eenen saterdach dat dat gheschach

 

Mer tsaemdaechs mosten si weder om scheiden

 

xix. venlijn men vlieghen sach

 

Si hoorden daer quam so groote geuelt |

 

Meynaert van ham moste ruymen dat velt

 

Dat deden die Borgoensche heeren

 

Het narren spel wilden si hen leeren

 

 

 

8

 

Thof van bourgoengien willen wi louen.

 

dat ons heeft ontsedt met spijse en dranck

 

Nv sitten wi bi den cackelouen

 

Nirredom noey is onsen sanck

 

Op meynerts gaerde worden ons billen bloet

 

die Keyser loont ons met penninghen root

 

wi maken ons cleederen doorsneden

 

Naer oude lants knechten zeden

 

 

 

9

 

Die dit liedeken dichten

 

Dat was een lants knecht goet

 

Sijn hert dat sachmen verlichten

 

Hi isser wel toe ghemoet

 

Om hensborch te houden en drincken den wijn

 

Op meynerts gaerde en wilt hi niet meer zijn

 

Hi laet hem sijn brillen vercoopen

 

Hi wilt blijuen bi tkeysers hoopen