Antwerps liedboek

185 Een nyeu liedeken

1
EYlaes ic arm allendich wijf
moet mijnen noot wel druckich clagen
Ick heb een man een lecker catijf
Ick moeter vele me verdraghen
Ick cruype sonauwe onder den steert
Dan segt hi Sulc wijf is veel eeren weert

2
Smorghens makic hem goet bieren broot
Ghesuyckert wel om sijn versoten
Dan stel ic hem sinen kacksetel ist noot
Met een warm bardeken onder sijn voeten
Ick vraghe oft hi yet meer begheert
Dan segt hi Sulc wijf is veel eeren weert

3
Snoenens heeft hi een hoenken wel gebraen
Dat eet hi varm al vanden spete
dan moet ic om een stoop wijn ooc gaen
En cappers brenghen voor sijn mete |
Ick vraghe oft hi yet meer begeert
dan segt hi. Sulc wijf is veel eeren weert

4
Ick sie hem peerkens inde wijn
Wel ghepoert tot sinen greye
gherooste rammekens moetender zijn
die duerweyct in maluizeye
Ick bray hem castaengekens inden heert.
dan segt hi Sulc wijf is veel eeren weert.

5
Dan comt hem een noenslaepken aen
dat moet twee vren lanc ghedueren
Sijn volcxken weet hi te vinden dan
dan drinct hi me tot den ses vren
Ic en vraghe hem niet wat hi verteert
dan segt hy Sulc wijf is veel eeren weert.

6
Ick decke die tafel ic make goet vier
Ic stelle hem voort wat hi mach dencken
Mach hi gheen wijn ic hale hem bier
Dan doet hi mi een bacxken schincken
Hi en brenget mi niet en ic ontbeert
dan segt hi Sulc wijf is veel eeren weert.

[fol. 105v]

 

7

 

Oorlof noch warm ic om zijn ghemack

 

Sijn bedde daer hi op gaet rusten

 

daer light hi met sinen palullen slap

 

Hi vijst hi schijt al waert een peert

 

dan peynsick Ghi en sijt niet veel eeren weert