Antwerps liedboek

130 Een nyeu liedeken

1
O Waerde mont.
Ghi maect ghesont
Mijns herten gront
Tot alder stont
Als ick bi v mach wesen.
So ben ick al genesen

2
Mer tscheyden quaet
Van tfier gelaet
maect mi disperaet
Ten baet gheenen raet
Wilt si mi nv begheuen |
Van vruechden moet ic sneuen

3
Haer schoon ghelu hayr.
Haer oochskens claer
Breghen mi in vaer
Nv hier nv daer
dat icse soude verliesen
Oft si een ander soude kiesen

4
Haer lippekens root
Haer borstkens bloot
Al sonder ghenoot
Maken mi vroecht groot
Als ic bi haer mach rusten
Boete ic mijns herten lusten

5
Schoon lief doet wel
Ende kiest niemant el.
In narst in spel
Doet mijn beuel
Ende hout gelofte in trouwen
Het en sal v niet berouwen